Romano Prevod Tari Biblija
AA

1 Jovanovo 5

Pobeda upral ko sveto

1Sekoj, koj verujnela deka o Isus tano Hristos, bijamo tano taro Devel; sekoj, koj mangela e roditele, mangela hem okole, koj tano bijamo Olestar. 2Palo odova pendžaraja deka mangaja e Devleskere čhaven, koga mangaja e Devle hem pazinaja Oleskere zapovedia. 3Soske akavaj tano o mangipe e Devleskoro, te ispolnina Oleskere zapovedia; a Oleskere zapovedia nae phare, 4soske sa soj tano bijamo taro Devel, pobedinela o sveto; hem akavaj tani i pobeda koja pobedingja o sveto: amari vera.

5Koj tano ov, koj pobedinela o sveto, ako na okova, koj verujnela deka o Isus tano e Devleskoro Čhavo? 6Ovi tano Okova Koj alo preku pani hem rat, o Isus Hristos; nae samo pajneja, nego pajneja hem rateja; hem o Duho tano Okova Koj svedočinela, soske o Duho tano čačipe. 7Soske trini tale koj svedočinena: 8o Duho hem o pani hem o rat, hem akala trin tane soglasna.

E Devleskoro svedoštvo baši Plo Čhavo

9Ako priminaja o svedoštvo e manušengoro, e Devleskoro svedoštvo tano pobaro. A akavaj tano e Devleskoro svedoštvo, deka svedočingja baši Plo Čhavo. 10Koj verujnela e Devleske ko Čhavo, isile svedoštvo ki peste; koj na verujnelale e Devle, kjergjale hovavno, soske na poverujngja ko svedoštvo, kova o Devel svedočingja baši Plo Čhavo.

11Hem akavaj tano o svedoštvo: o Devel dengjamen večno životo, hem odova život tano ko Oleskoro Čhavo. 12Kas isile e Čhave, isile život; kas naele e Devleskere Čhave, naele život.

I delotvorno molitva

13Akava pišingjum tumenge, koj verujnena ko anav e Devleskere Čhaveste, za da te džanen deka isitumen večno životo hem te verujnen ko anav e Devleskere Čhaveste. 14Hem akavaj tani i doverba koja isiamen ki Leste: deka šunelamen ako rodaja nešto pali Oleskiri vojlja. 15Hem koga džanaja deka šunelamen, so hem te molinale, džanaja deka isiamen dobimo o molbe so rodingem Olestar.

16Ako nekoj dikhela pe phrale te kjerel grevo, so na ingarela ko meriba, neka molinel, hem ka dele život, ustvari okolenge, koj na kjerena grevo so ingarela ko meriba. Isi grevo so vodinela ko meribe, baši odova grevo na vakjerava te molinen. 17Sekoja nepravda tano grevo, a isi grevo so na ingarela ko meriba.

O Čačutno Devel

18Džanaja deka nijek, koj tano bijamo taro Devel, na grešinela, nego o bijamo taro Devel pazinelape pes hem o lukavo na doprinelape uzi leste. 19Džanaja deka amen sijem taro Devel, a celo sveto tano ki vlast e lukavoske. 20Isto agjar, džanaja deka e Devleskoro Čhavo alo hem dengjamen razum, za da te pendžara e Čačutne. Hem amen sijem ko Čačutno, ko Oleskoro Čhavo o Isus Hristos. Ovi tano čačutno Devel hem večno životo.

21Čhavalen, pazinen tumen taro idojlja. Amin!