1 Timotej 3
Sar valjani te oven o vodačia
1Točnoj tano deka koga nekoj mangela te ovel vodači ki crkva, mangela but šukar buti. 2Spored odova, o vodači trebela te ovel: neporočno, rom jeke romnaja, nerno, gogjaver, šukar ugled, gostoljublivo, sposobno baši te sikavel; 3na pijandžija, nitu na te kjerel sa silaja, na samo te mislinel baši o pare, nego krotko, te na ovel te rasprajnelpe, hem te na ovel alčno, 4koj upravinela šukar ple khereja hem isile pokorna čhave celosno te poštojnenle, 5soske ako na džanela te upravinel ple khereja, sar ka grižinelpes baši e Devleskiri crkva?
6Te na ovel nevo obratimo, za da ma te vazdelpe ko baro hem te perel ki osuda e bengeskiri! 7A trebela te ovel hem te kjeren šukar lafi oleskoro hem avrijaldan, za da ma te perel ki stapica e bengeskiri hem te ladžakjerelpes.
Sar valjani te oven o gjakojna
8Isto agjar, o gjakojna trebela te oven česna, na dujmujale, te na mangen but mol, na alčna baši melale pare, 9koj pazinena i tajna e verakiri čisto sovesteja. 10Hem ola prvo te oven ispitime, hem posle te kjeren i služba ako tane neporočna.
11Isto agjar o romnja lengere trebela te oven česna, te na klevetinen; nerne hem verna ko sa.
12O gjakojna te oven roma jeke romnakere, koj upravinena šukar ple čhavencar hem ple kherencar, 13soske okola, koj izvršinge šukar pli služba dobinena česno položba hem bari smelost ki vera ko Hristos Isus.
Bari tani i tajna e devlipaskiri
14Akava pišinava tuke, nadinavama deka skoro ka avav ki tute; 15ama slučajno te zabajngjuma, te džane sar te ponašinetut e Devleske ko kher, koj tani crkva e dživde Devleskiri, stubo hem potpora e čačipaskoro.
16Hem bizo sumna, bari tani i tajna e devlipaskiri:
Okova, Koj javingjape ko telo,
sine opravdimo ko duho,
sikagjapes e angelenge,
sine najavimo maškar o narodia,
poverujngele ko sveto,
sine voznesimo ki slava.