O baripa e Gospodareskoro

E Davideskoro Blagodarnost

¹Ka proslavinav Tut, O Devla, mo Caro, ka blagoslovinav Tlo anav uvek hem dovek.

²Ka slavinav Tut sekova dive, ka falinav To anav uvek hem dovek.

³O Gospodari tano baro hem dostojno tano baši sekoja pofalba, Oleskoro baripa našti te reselpe!

⁴Taro pokolenie ko pokolenie falinenape Tle dejlja, hem vakjerenape Tle silna dejlja.

⁵Ka vakjerav baši o baro šužipa tari Tli slava taro Tlo baripe, hem baši Tle čudia.

⁶Ka vakjeren hem baši i sila taro Tle strašna dejlja hem me ka vakjerav baši Tlo baripe.

⁷Sar jek izvor so na ačhola te thavdel, ka vakjeren so setinenape baši Tlo baro gudlipa, hem ka giljaven Tli pravda.

E Gospodareskiri milost

⁸Žalostivo hem milostivo tano o Gospodari, isile baro strplenie hem buti milostivo.

⁹O Gospodari tano gudlo baši o sarine, milostivo talo baši sa Ple dejlja.

¹⁰Neka slavinen Tut, Gospodar, sa Tle dejlja, hem Tle vernikja neka blagoslovinen Tut!

¹¹Neka kjeren lafi baši i slava taro Tlo Carstvo, neka vakjeren baši Tli sila.

¹²Te objavinen len baši o manušikane čhave: Tli sila hem slava taro Tlo prekrasno Carstvo.

¹³Tlo Carstvo tano večno carstvo, Tlo vladiba baši sa o pokolenia.

¹⁴O Gospodari potkrepinela sarinen koj perena, hem Ov isprajnela okolen soj tele tane ničkum.

¹⁵O jajkha sarinengere vrtime tane ki Tute, Tu deja lenge hajbaske ko pravo vreme.

¹⁶Tu phraveja Tlo vas, hem kjereja te ovel čali i želba sarinengiri.

¹⁷Pravedno tano o Gospodari ko sa Ple drumia, hem šukar tano ko sa Ple dejlja.

¹⁸O Gospodari tano paše uzo sarine koj vikinenale, uzo sarine koj iskreno vikinenale.

¹⁹Ov pherela o želbe okolengere koj darana Olestar, šunela olengoro vikiba hem spasinela len.

²⁰O Gospodari pazinela okolen, koj mangenale, a ka uništinel sa e bilačhen.

²¹Neka mo muj slavinel e Gospodare, hem sekova telo neka slavinele Oleskoro sveto anav, uvek hem dovek.