Molitva baši koga sijan ki tuga

E Davideskiri Molitva

¹Gospodar, čhiv To kan popaše hem šun man, soske sijum čorolo hem čhindo nae man takati.

²Arak mi duša, soske sijum devlikano manuš; spasin Tle sluga, so nadinelape ki Tute!

³Tu mlo Devel, O Gospodar, sikav To milost mange, soske stalno vikinava ki Tute.

⁴Radujnkjerla i duša Tle slugaskiri, soske ki Tute, Gospodar, vazdava mli duša.

⁵Soske Tu sijan, Gospodar, šukar, hem mangeja te oprostine; pherdo sijan mangipaja sprema sarinende, koj vikinena Tut.

⁶Šunla, Gospodar, mi molitva, hem pazin ko mo glaso koga vikinava Tut.

⁷Ko pharo dive vikinavatu Tut, soske ka šune man.

⁸Nae Tuke nikoj ramno maškar o devejlja, Gospodar, nane dejlja save soj tane Tle.

⁹Sa o narodia, so sozdajngjan len, ka aven hem ka pokloninen pes Tuke, O Gospodar, hem ka proslavinen Tlo anav.

¹⁰Soske Tu sijan veličestveno, hem kjereja čudia: Tu sijan Edinstveno Devel.

¹¹Sikav man ko Tlo drumo, Gospodar, za da te džav verno sprema Tute, celosno mo srce te daral taro Tlo anav!

¹²Ka falinav Tut, Gospodar, mo Devel, sa mle srceja; ka slavinav Tlo anav dovek.

¹³Soske tano izobilno Tlo mangipe sprema mande, cidingjan mli duša hor telaldan tari phuv.

¹⁴O Devla, okola ko baro so kjerenape uštile protiv mande, but silnikja rodena mo životo, hem nae len Tut anglo jajkha lengere.

¹⁵Ama Tu sijan, Gospodar Devla, milostivo hem gudlo, bavno ki holi, pherdo ko mangipe hem čačipe.

¹⁶Dik ki mande, muk To milost ki mande, dela Ti sila Te slugaske hem spasin e Čhave tari Ti sluginka!

¹⁷Sikav mancar čudo šukaripaske, pa te dikhen okola so mrzinena man, hem te ladžan, soske Tu, Gospodar, pomožingjan man hem utešingjan man.