1 Jovanovo 2

O Hristos amaro Zastapniko

¹Mle čhavalen, akava pišinava tumenge za da ma te grešinen; hem ako nekoj grešinela isiamen Zastapniko ko Dat: o Isus Hristos, o Pravedniko. ²Ovi tano žrtva so pomiringja baši amare grevia; na samo baši amare, nego hem baši o grevia e celo svetoskere.

³Hem palo odova džanaja deka pendžarajale, ako pazinaja Oleskere zapovedia. ⁴Koj vakjerela: „Pendžargjumle,“ a na pazinela Oleskere zapovedia, hovavnoj tano hem o čačipe nae tano ki leste. ⁵A koj pazinela Oleskoro slovo, ki leste, čače, o mangipe ko Devel reslja dži ko sovršenstvo. Palo odova džanaja deka sijem ki Leste. ⁶Koj vakjerela deka ačhola ki Leste, ov trebela te džal, sar so džala sine Ov.

Nevi zapoved

⁷Mangljalen, na pišinava tumenge nevi zapoved, nego i purani zapoved, so primingenla taro početok; i purani zapoved tano o slovo, so šungenle. ⁸No sepak pišinava tumenge nevi zapoved; hem odovaj tano čačutno hem ki Leste hem ki tumende – soske i temnina nakhela, a i čačutni svetlina vekje svetinela.

⁹Koj vakjerela deka tano ki svetlina, a mrzinela pe phrale, ovi tano dži akana ki temnina. ¹⁰Koj mangela pe phrale ačhola ki svetlina hem ki leste nae ništo so bi šaj sine nekas te čhivel ko grevo. ¹¹A koj mrzinela ple phrale ki temnina tano hem ki temnina džala, hem na džanela kaj džala, soske i temnina kojrargja o jajkha leskere.

¹²Pišinava tumenge, čhavalen, soske oprostime tumare grevia, baši Oleskoro anav. ¹³Pišinava tumenge, dadalen, soske pendžargen Okole, Koj tano taro početok; pišinava tumenge, ternalen, soske pobedingen e bilačhe. Pišingjum tumenge, čhavalen, soske pendžargen e Dade. ¹⁴Pišingjum tumenge, dadalen, soske pendžargen Okole, Koj tano taro početok. Pišingjum tumenge, ternalen, soske sijen silna hem soske e Devleskoro slovo živinela ki tumende hem soske pobedingen e bilačhe.

Ma mangen o sveto

¹⁵Ma mangen o sveto, nitu okova soj tano ko sveto. Ako nekoj mangela o sveto, o mangipa taro Devel o Dat nae tano ki leste, ¹⁶soske sa soj tano ko sveto - i pohota e teloskiri, i pohota e jajkhengiri hem i gordost e životoskiri - nae tano taro o Dat, nego taro sveto. ¹⁷A o sveto nakhela hem oleskiri pohota, a koj izvršinela e Devleskiri vojlja ačhola dovek.

E Hristoskere dušmajna

¹⁸Čhavalen, o posledno saati tano; hem sar so šungen deka o antihrist avela, agjar akana uštile but antihristia; palo odova džanaja deka tano o posledno saati. ¹⁹Amendar iklile, ama na sine amendar, soske ako sine amendar, ka ačhoven sine amencar, nego trebela sine te sikavelpes deka nae tane sarine amendar.

²⁰A tumen isitumen pomazanie taro Svetiot hem džanena sa. ²¹Na pišingjum tumenge sar te na džanen o čačipa, nego soske džanena hem soske nijek hovajba nae tano taro čačipe. ²²Koj tano o hovavno, ako na okova, koj odrekujnela deka o Isus tano Hristos? Akava tano antihrist – koj odrekujnela e Dade hem e Čhave. ²³Sekoj so odrekujnela e Čhave naele ni e Dade; koj ispovedinela e Čhave, isile hem e Dade.

Ačhoven ko Hristos

²⁴So šungen taro početok, odova te ačhol ki tumende. Ako ačhola ki tumende okova so šungen taro početok, hem tumen ka ačhoven ko Čhavo hem o Dat. ²⁵A akavaj tano o vetuvanje so Ov vetingjale amenge: večno životo.

²⁶Akava pišingjum tumenge baši okola, koj hovavena tumen. ²⁷A tumen, ki tumende ačhola o pomazanie so primingen Olestar hem nae tano potrebno nekoj te sikavel tumen, nego sar so Oleskoro pomazanie sikavela tumen baši o sa, hem tano čačutno hem nae tano hovajba, hem sar so sikagja tumen, agjar ačhoven ki Leste. ²⁸Hem akana, čhavalen, ačhoven ki Leste, za da te ovelamen smelo doverba koga ka javinelpes Ov hem za da ma te ladžakjeramen anglo Leste, ko Oleskoro ajbe. ²⁹Ako džanena deka Ovi tano pravedno, džanen deka sekoj koj kjerela pravda, tano bijamo taro Olestar.