Romano Prevod Tari Biblija
AA

1 Jovanovo 3

E Devleskere čhave

1Dikhen savo mangipe dengjamen o Dat: te vakjeramen Devleskere čhave. A odova hem sijem! Odoleske o sveto na pendžarelamen amen, soske na pendžarge Ole. 2Mangljalen, akana sijem Devleskere čhave, hem panda na otkringjape so ka ova; ama džanaja: koga ka otkrinelpe ka ova Oleske slična, soske ka dikhale asavko savo soj tano. 3Hem sekoj koj isile akaja nadež ki Leste očistinelapes korkori, sar soj tano hem Ov čisto.

4Sekoj koj kjerela grevo, kjerela hem bezzakonie; hem o grevo tano bezzakonie. 5Hem džanena deka Ov javingjapes za da te otstraninel o grevia, a ki Leste nae grevo. 6Sekoj koj ačhola ki Leste, na grešinela; sekoj koj grešinela, na dikhljale Ole, nitu pendžargjale.

7Čhavalen, nikoj te na zabludinel tumen. Koj kjerela pravda pravednoj tano, sar soj tano Ov pravedno. 8Koj kjerela grevo taro beng tano, soske o beng grešinela taro početok. Odoleske javingjape e Devleskoro Čhavo, za da te pejljarel o dejlja e bengeskere.

9Sekoj, Koj tano bijamo taro Devel na kjerela grevo, soske Oleskoro seme ačhola ki leste, hem našti te grešinel, soske tano bijamo taro Devel. 10Palo akava pendžarenapes e Devleskere čhave hem e bengeskere čhave: sekoj koj na kjerela pravda hem na mangela pe phrale, nae tano taro Devel.

Te mangamen jek jekeja

11Soske akavaj tano o haberi so šungen taro početok: te mangamen jek javereja! 12Na sar so o Kain sine taro bilačho hem mudargja pe phrale. Hem soske mudargjale? Soske oleskere dejlja sine bilačhe, a oleskere phraleskere – pravedna. 13Ma čudinen tumen, phrajljalen, ako o sveto mrzinela tumen.

14Amen džanaja deka nakhlem taro meriba ko život, soske mangaja e phralen. Koj na mangela pe phrale, ov ačhola ko meriba. 15Sekoj, koj mrzinela pe phrale, tano manušubico, a džanena deka ko nijek manušubico ki peste naele večno životo.

16Palo odova pendžargem o mangipe, so Ov dengja Plo životo baši amenge; hem amen sijem dužna te da amare životia baši o phrajlja. 17A koj isile svetsko gudlipa hem dikhela pe phrale ko nanipa, pa phandela plo srce ki leste, sar ka ačhol e Devleskoro mangipe ki leste? 18Mle čhavalen, te na manga lafencar ili samo čhibaja, nego ko delo hem čačipe.

Uverime anglo Devel

19Palo odova ka pendžara deka sijem taro čačipe, pa ka uverina amare srcia anglo Leste, 20soske koga amaro srce osudinelamen, o Devel tano pobaro taro amaro srce hem džanela sa.

21Mangljalen, ako o srce na osudinelamen, isiamen smelost anglo Devel, 22hem so hem te zamolina Ole, priminaja Olestar, soske pazinaja Oleskere zapovedia hem kjeraja soj tano blagougodno anglo Leste. 23A Oleskiri zapoved tani akaja: te verujna ko anav Oleskere Čhaveste o Isus Hristos hem te mangamen jek javereja, sar so zapovedingja amenge. 24Hem koj pazinela Oleskere zapovedia ačhola ki Leste hem Ov - ki leste. Hem palo odova džanaja deka Ov ačhola ki amende: palo Duho Kas so dengjamen.