Romano Prevod Tari Biblija
AA

1 Petrovo 2

O Dživdo Bar hem o birimo narodo

1Hem agjar, čhiven ki strana sekova bilačhipa hem sekova hovajbe, dujmujalipa, zavist, hem sekoja kleveta. 2Sar neve bijande čhave, kopninen palo čisto duhovno thud e slovoskoro, za da te bajron preku leste baši o spasenie, 3ako vkusingen deka o Develi tano šukar.

4Pristapinen ki Leste, o dživdo Bar, Kas so čače o manuša otfrlingele, ama Koj tano taro Devel birimo, hem skapoceno, 5ta dozvolinen korkori tumendar, sar dživde bara, te gradinelpe duhovno kher, sveto sveštenstvo, za da te prinesinen duhovna žrtve, kolaj tane prijatna e Devleske, preku o Isus Hristos. 6Soske pišinela ko Sveto Pismo:

‘Eke, postajnava ko Sion agolno Bar,
odbirimo hem skapoceno;
hem koj verujnela ki Leste, nae te ladžakjerelpe.’

7Agjar, baši tumenge, koj so verujnena, Ovi tano skapoceno; a baši okola kola so na verujnena,

‘Bar, kova so otfrlingele o Dzidajra,
ama Koj ulo agolno Bar,’

8hem

‘Bar baši sopnibaske,
hem karpa soblaznibaske,’

ki koja sopninenape okola, koj tane nepokorna e Slovoske: soske tane hem opredelime.

9A tumen sijen izbirimo rodo, carsko sveštenstvo, sveto narodo, narodo pridobimo, za da te proglasinen o slavna dejlja Okoleskere, Koj povikingja tumen tari temnica ki Pli čudesno svetlina, 10tumen kola nekogaš na sijen sine narodo, akana sijen Devleskoro narodo, tumen kola nekogaš na sijen sine pomilujme, akana sijen pomilujme.

11Mangljalen, molinava tumen: sar jabandžie hem privremena žitejlja te vozdržinen tumen taro telesna želbe, soske ola vojnena protiv i duša. 12Ponašinen tumen šukar maškar o narodo, agjar so tokmu ko odova baši so klevetinena tumen sar manuša so kjerena bilačhipa; upri osnova ko tumare šukar dejlja koga ka dikhenlen te proslavinen e Devle ko dive e posetakoro.

Te ova pokorna baši o vlastia

13Zaradi o Gospodari pokorinen tumen baši sekoja manušikani vlast: bilo caroske, sar vrhovninko, 14bilo upravitelenge, sar oleskere pratenikja, za da te kazninenlen okolen bilačhipe so kjerena, a te pofalinenlen okolen koj kjerena šukar. 15Soske akavaj tano e Devleskiri vojlja, kjeribaja šukar te phanden o muja hem o bidžandipa e bigogjakere manušengoro, 16sar slobodna; hem na sar okola, koj upotrebinena i sloboda, sar pokriv e bilačhipaske, nego sar Devleskere sluge. 17Poštojnen sarinen, mangen o phralipa, daran taro Devel, poštojnenle e caro.

18Sluge, pokorinen tumen lenge tumare gospodarenge celosno daraja, hem na samo e šukarenge hem e krotkonge, nego hem e nepravednonge. 19Soske odovaj tano blagodat, koga nekoj cidela nepravedlivo hem podnesinela muke, ha-tri e Devleskoro. 20Inaku zar bi ovela za pofalba, ako trpinena zaslužimi kazna? Ama ako kjerena šukar, a sepak cidena, odovaj tano vredno e Devleske ko jajkha.

O Hristos muklja primer

21Soske baši odova sijen povikujme, soske hem o Hristos cidingja baši tumenge, hem muklja tumenge primer, za da te džan palo oleskere stapke:

22‘Ov na kjergja grevo
hem na arakhlisalilo hovajbe ko Leskoro muj.’

23Ov Koj sine navredimo, na iranela sine navredaja; koga cidela sine na zakaninelape sine, nego predajngjape Pes Okoleske, Koj sudinela pravedno. 24Ov korkori ko Plo telo legargja amare grevia ko kaš, ta amen, te ova mule baši o grevia, te živina baši pravda; preku Oleskere rane iscelingen tumen.

25Soske phirena sine sar našavde bakhre, ama akana irangen tumen ko Pastiri hem o Čuvari taro tumare duše.