Romano Prevod Tari Biblija
AA

1 Petrovo 4

Te živina baši e Devleskiri slava

1Hem agjar, soske o Hristos cidingja ko telo baši amenge, naoružinen tumen hem tumenda e isto mislaja, soske koj cidingja ko telo prekiningja taro grevo, 2ta so ačhilo o vreme e životoskoro ko telo, te na nakhenle spored manušikane strastia, nego spored e Devleskiri vojlja. 3Soske dosta tano so ko anglutno vreme kjerena sine i vojlja e narodoskiri, odoleja so živinena ko razvrat, ko strastia, ko piba, gozbe, ko matiba hem ko bezzakonsko idolopoklonstvo.

4Adaleske akana hem čudinenapes deka tumen na prastana olencar ki isto krajnost ko razvratna bukja, hem vakjerena protiv tumende; 5ola ka den smetka Okoleske, Koj tano gotovo te sudinel e dživdenge hem e mulenge. 6Ustvari odoleske propovedimo tano o Evangelie hem okolenge soj tane akana mule, za da te oven sudime spored manušikano ko telo, a e duhoja akana te živinen spored o Devel.

7A o krajo baši o saj tano paše. Hem agjar, oven gogjavera hem džangavde ko molitve. 8Angleder o sa neka oveltumen postojano mangipa maškar tumende, soske ‘o mangipa učharela but grevia.’ 9Oven gostoljubliva jek javereske, bizo te ovel tumenge pharo te kjeren odova.

10Soske sekoj tumendar dobingja dari, služinen tumen oleja jek jekeja, sar šukar domakijna tari butkratno Devleskiri blagodat. 11Ako nekoj kjerela lafi, neka kjerel sar Devleskere lafia; ako nekoj služinela, neka služinel sar ki sila, koja o Devel delala, za da te slavinelpe ko sa o Devel preku Isus Hristos, Kaske pripadinela i slava hem i sila ko sa o vekja. Amin.

Cidena e Hristoske

12Mre mangljalen, ma čudinen tumen baši o jagakere ispituvanja, so pojavingepe maškar tumende, za da te iskušinel tumen, sar te phene slučingjovela tumenge nešto neobinčno, 13nego radujnen tumen deka součestvinena e Hristoske ko cidiba, za da te šaj te radujnen tumen hem te veselinen tumen ko otkrovenie ki Leskiri slava.

14Blažena sijen ako prefrlinena tumenge baši e Hristoskoro anav, soske togaš o Duho e slavakoro hem e Devleskoro duho bešela upra tumende. Čače, spored olende, Ovi tano hulimo, ama spored tumende, Ovi tano proslavimo. 15Ustvari nikoj tumendar ma te cidel sar ubica, ili čor, ili bilačhipe so kjerela ili sar okova koj mešinelape ko tugja bukja, 16ama ako cidela sar Hristijani, te na ladžal, nego te slavinel e Devle adale anaveja, 17soske tano vreme te počminel o sudo taro e Devleskoro kher; a ako počminela prvo amendar, sar bi ovela lengoro krajo okolengoro, kola so na pokorinenape e Devleske ko Evangelie? 18Hem

‘ako o pravedniko edvaj spasinelape,
kote ka sikavenpes o bezbožniko hem o grešniko?’

19Odoleske hem okola, kola cidena e Devleskere vojljaja, te predajnen pe duše e verno Sozdateleske, kjeribaja šukar.