2 Petrovo 1
1O Simon Petar, sluga hem apostoli e Isuse Hristoskoro, dži ko okola, kola preku i pravda amare Devleskiri hem Spasiteli o Isus Hristos priminge isto skapoceno vera sar hem amen: 2i blagodat hem o mir te umnožinel pes tumenge ko pendžariba e Devle hem e Isuse, amaro Gospodari.
Ov dengja amen sa soj amenge potrebno
3Soske Leskiri devlikani sila dengja amen sa soj amenge tano potrebno baši pobožno životo, preku pendžariba Okole, koj vikingja amen preku Pli slava hem šukaripa, 4koleja amenge dende tane o skapocena hem najbare vetuvanja, ta preku olende te učestvinen e Devleske ki priroda, otkoga našlen taro rumimo životo, kovaj tano ko sveto, preku pogrešna strastia, kola vladinena ko sveto.
5Baši odova den sa tumendar hem pheren tumari vera šukaripaja, a o šukaripa, e džandipaja, 6a o džandipa, ikeribaja kontrola korkori ki tumende, a o ikeriba kontrola korkori ki tumende, e trpenieja; a o trpenie, te ovel devlipaja; 7a o devlipa, phralikane tate mangipaja; a o tato phralikano mangipa, te ovel iskreno mangipaja. 8Soske ako isi tumen sa akava ki tumende hem adava umnožinelape, na kerela tumen mrzale hem sar okola so na dena plodi ko pendžariba amare Gospodare e Isuse Hristo. 9Ama, kas nae odova, koroloj tano hem kratko dikhela: soske bistergja deka tano očistimo taro ple purane grevia.
10Odoleske phrajljalen, dikhen te keren maškar tumende panda poviše te zacvrstinen odova so o Devel vikingja tumen, hem so odbiringja tumen. Ako kerena odova nikogaš nae te sopninen tumen. 11Togaš o Devel izobilno ka phravel tumenge o porte taro nebo za da te khuven ko večno carstvo amare Gospodareskoro hem Spasiteli o Isus Hristos.
12Odoleske ka dikhav uvek te potsetinav tumen baši akala bukja, iako džanena tumen, hem cvrsto temelime sijen ko čačipe so isi ki tumende. 13Ama mislinava deka tano pravo dži kote sijum ko akava šatori ko mlo telo, te džangavav tumen odoleja so ka opomeninav tumen, 14soske džanava deka panda hari ka mukav mlo šatori, sar so jasno sikagja mange baši odova amaro Gospodari o Isus Hristos, 15a ka dav mandar sa tumen, palo mlo džajbe, te setinen tumen uvek baši akala bukja.
Dikhlem amare jajkhencar Oleskoro baripe
16Soske amen sikagem tumenge i sila hem o ajbe amare Gospodareskoro o Isus Hristos, na preku izmislime paramisa, nego korkori amen dikhlem amare jajkhencar baši Oleskoro baripe, 17soske Ov primingja taro Devel o Dad čest hem slava, koga taro Oleskoro baripe e slavakoro alo Leske o glaso: „Akavaj tano Mlo manglo Čhavo, ki Kaste Mi vojlja tani.“ 18Amen šungem o glaso, koj alo taro nebo, koga sijem sine Oleja ki sveto gora.
19Hem agjar isi amen pozoralo slovo baši proroštvo, a tumen kerena šukar so pazinena ki leste, sar svetlina so svetinela ko than kote so isi karanluko, dži kote na pravgjola o dive hem i čereni Denica na zasvetinela ko tumare srcia. 20Džanen akava angleder o sa: ni jek proroštvo ko Sveto Pismo našti te tumačinelpe koj sar so mangela, 21soske nikogaš o proroštvo na alo tari manušikani vojlja, nego o sveta Devleskere manuša kerena sine lafi vodime taro Sveti Duh.