2 Petrovo 2
Hovavne prorokja
1A sine da hem hovavne prorokja ko narodo, sar so ka ovel hem maškar tumende hovavne učitejlja, kola garavindor ka anen bange veruvanja so ka anen uništiba, hem ka džan protiv o Gospodari, Koj kingja len, lena upri peste sigate uništiba, 2hem but džene ka džan palo lengoro rumimo drumo, baši kaste ka hulinelpe o drumo taro čačipa. 3Hem ko korist so dikhena samo peske ka iskoristinen tumen izmislime hovavne lafencar, ama ola odamna več gotovo osudime hem lengoro propast na dreminela.
4Soske ako o Devel na arakhlja len e angelen kola grešinge, nego predajngja len ko phanlipa e karanlukoskere, frdingja len ko pekol za da te oven odothe arakhle sa dži ko sudo; 5hem ako na arakhlja o purano sveto, nego pazingja samo e Noe, koj propovedinela sine i pravda, hem panda evta dženen, koga muklja potop upro sveto kova so na verujnela sine ko Devel; 6ako osudingja len baši propast o diza o Sodom hem o Gomor hem kergja len ko pravo, hem čhigja len sar primer baši o javera kova so nae te verujnen ko Devel hem so živinena bilačho životo; 7hem ako izbavingja e pravedniko o Lot, kas so mučinela sine o rumimo životo e bilačhe manušengoro, 8soske akava pravedniko, živibaja maškar olende, mučinela sine pli pravedno duša taro dive ko dive, dikhibaja hem šunibaja olengere bilačhe dejlja – 9odova značinela deka o Gospodari džanela sar te izbavinel e pobožna manušen taro iskušenie, a okola so nae tane pravedna te pazinel len baši kaznibaske dži ko dive e sudoskoro; 10a pogotovo okola, kola džana palo melale pohote e teloskere, hem na mangena o avtoriteti e Devleskoro. But drska manuša hem ko bareste kerena odova so mangena, ola na darana te vakeren bilačhipe baši o bare nebesna vlastia, 11dži kote o angejlja, kolaj tane pobare ki sila hem ki snaga, na vakerena bilačhe lafia protiv olende anglo Gospodari.
12A akala, sar bigogjakere životnia, so živinena sprema i priroda agjar sar ka avel lenge na mislinena baši ništo, bijame tane baši te lovinen hem te mudaren, na džanena kas uvredžinena. Odoleske sar životine, ola ka oven mudarde, 13hem ka dobinen kazna baši odova so nae pravedna. Ola računinena o rumimo životo diveskoro baši plo zadovolstvo, nečista hem biladžakere tane ola, kola uživinena ple hovajbaja koga khedenape te han tumencar. 14Olengere jajkha pherde preljubaja hem na cidena pes taro grevo; ola hovavena odole manušen so nae stabilna. Isi len srce sikavdo te dikhen samo peske; olaj tane čhave prokletime.
15Mukle o čačikano drumo hem našavsalile, hem gele palo drumo taro Valaam*, o čhavo e Vosoreskoro, koj manglja nepravedno plata, 16ama vikingja leske baši oleskoro bilačhipe so kergja: laloro her so kerela lafi ko manišikano glaso hem čhinagja e prorokoskoro delinipa.
17Olaj tane sar bunajra bizo pani hem oblakja so ingarela len i bavlal; baši olenge arakhelape baro karanluko zauvek. 18Soske odoleja so kerenape ko baro hem kerena lafi ko čučo, preku ple želbe e teloskere hem preku ple rumime bukja, hovavena okolen koj samo so našle okolendar so živinena ki zabluda; 19obečinena lenge sloboda a korkori tane robia baši o rumime bukja, soske nekoj taro soj tano pobedimo, hem oleske ovela tano robo.
20Ako ola cidinge pes taro melale bukja, kola so kerena sine ko akava sveto koga pendžarge amare Gospodare hem Spasiteli o Isus Hristos, hem akana palem pletkinge pes ki stapica taro rumimo životo hem perena palo odova hem našti iklovena, togaš olengoro avdisutno životo tano pobilačho taro okova so sine len angleder. 21Ustvari, baši olenge ka ovel sine pošukar te na pendžaren sine o drumo e pravdakoro, nego otkoga pendžargele, te iranenpe tari sveto zapoved koja olenge tani dendi. 22Olenge ovela okova so isi jek čačikano lafi so vakerelape, ‘O džukel iranelape ko plo čhadiba,’ hem ‘O nangjardo balo iranelape te valkajnelpe ki čik.’
*Stiho 15: Baši o Valaam šaj te dikhen poviše koj tano ko Purano Zavet ko Broevi 22-24.