2 Petrovo 3

O Posledna Dive

¹Mangljalen, akavaj tano vekje dujto poslanie, so pišinava tumenge, hem ko solduj džangavava tumen, odoleja so potsetinava tumen, te razmislinen čisto gogjaja, ²za da te setinen tumen baši o lafia kova o sveta prorokja vakerge len angleder, hem baši i zapoved e Gospodareskiri hem Spasiteli, koja tumare apostojlja predajngela tumenge.

³Džanen angleder o sa akava: deka ko posledna dive ka javinen pes manuša so ka khelen pes e čačipaja, kola ple khelibaja ka džan palo pumare strastia e teloskere ⁴hem ka vakeren: „Kaj tano o vetuvanje baši Leskoro ajbe? Soske otkoga mule o dada sa tergjola agjar, sar so sine angleder panda taro sozdavanje.“

⁵Ola namerno bistrena deka o nebesia hem i phuv angleder panda sine kerde taro pani hem preku o pani e silaja preku e Devleskoro Slovo, ⁶hem preku odova, odova vreme o sveto sine potopimo pajneja hem agjar propadingja. ⁷A o avdisutne nebesia hem i phuv e isto slovoja pazimej, hem arakhenape baši jag dži ko sudno dive hem propast baši o manuša so na verujnena ko Devel.

E Gospodareskoro Dive

⁸Ama jek na smejnela te ovel tumenge bipendžardo, mangljalen, deka baši o Gospodari jek dive tano sar iljada berš, hem iljada berš sar jek dive. ⁹O Gospodari na dugovlačinela odova so obečingja, sar so nekoj mislinena baši odova dekaj bavno, nego sikavela Plo trpenie ki tumende, soske na mangela nekoj te propadinel, nego sarine te aven dži ko pokajanie.

¹⁰A e Gospodareskoro dive ka avel sar čor rakjate; ko odova dive o nebesia bare bučavaja ka našagjoven, hem sa o bukja so isi ki phuv jagaja ka uništinenpe hem i phuv ka thabljol hem sa so isi ki late.

¹¹Koga sa akava ka preperel, togaš save trebela te oven za da te živinen sveto životo hem pravedno angla ko Devel, ¹²tumen kola adžikerena hem sigjakerena o ajbe baši e Devleskoro dive, koga o nebesia tharde jagaja ka preperen hem sa o bukja so isi ki phuv jagaja ka topinen pes? ¹³A amen, sprema Leskoro vetuvanje, adžikeraja neve nebesia hem nevi phuv ki koja živinela i pravda.

Posledna lafia

¹⁴Odoleske, mangljalen, dži kote adžikerena akava, den sa tumendar, za da Ov te arakhel tumen ko mir bizo fleka hem bizo mahana, ¹⁵a o baro trpenie amare Gospodareskoro dikhenle sar spasenie, sar so hem amaro manglo phral o Pavle pišingja tumenge, sprema i mudrost soj dendi leske; ¹⁶sar so hem ko sa ple lila vakerela baši akava; ki lende isi nesave phare te haljonpe bukja, kola okola soj tane ko bidžandipe so nae tane učime hem so nae stabilna iranena naopaku, hem baši o javerada Pismia kerena ajgar, kerena peske uništiba.

¹⁷Hem agjar tumen, mangljalen, koga džanena akava angleder, pazinen tumen taro o hovajba e bilačhengere te na povlečinen tumen ki peste hem te na preperen taro tumaro cvrsto than kote so tergjovena, ¹⁸nego bajroven ki blagodat hem ko pendžariba amare Gospodare hem Spasitele o Isus Hristos. Oleske slava hem akana hem ko dive taro večnost. Amin!