2 Solunjajna 3
Molinen tumen baši amenge
1Najposle, phrajljalen, molinen tumen baši amenge, ta e Gospodareskoro slovo te prastal hem te proslavinelpe sar maškar tumende, 2hem amenda te oslobodina amen taro rumime hem bilačhe manuša, soske sarinen nae len vera. 3Ama verno tano o Gospodari, Koj ka zojrakerel tumen hem ka zapazinel tumen taro bilačho. 4Sigurna sijem ko Gospodari, baši tumenge, deka kerena hem deka ka keren okova so zapovedinaja tumenge. 5A o Gospodari te vodinel tumare srcia ko mangipe e Devleskoro hem ko trpenie e Hristoskoro!
Ciden tumen taro okola so nae len nisavo redo ni krajo ko životo
6A tumenge zapovedinaja, phrajljalen, ko anav amare Gospodareskoro o Isus Hristos, te ciden tumen taro sekova phral, koj tano badijavdžija, hem naele ni redo ni krajo ko životo, hem na džala palo učenje, so sikagem tumen. 7Korkori tumen džanena baši amenge sar živingem, hem sar trebela te dikhen tumen upri amende, soske amen na živingem sar badijavdžije maškar tumende, 8nitu halem nekaskoro maro, nego kergem buti mučno hem amare trudoja, i rat hem o dive, za da te na ova ko teret nekaske tumendar. 9Na baši odova deka na sine amen pravo ko odova, nego za da te da tumen korkori amen primer, te dikhen odova amendar hem tumenda te keren. 10Soske koga sijem sine tumencar, zapovedingem tumenge akava: ako nekoj na mangela te kerel buti, neka hem ma te hal!
11Šunaja deka nekoj maškar tumende živinena sar badijavdžije, ništo na kerena buti, nego zalelepe čuče bukencar. 12Asavkenge zapovedinaja hem opomeninaja len ko Gospodari o Isus Hristos te keren buti mirno hem te han plo maro. 13A tumenge, phrajljalen, te na dosadinelpe te keren šukar!
14Ako pak nekoj na šunelale amaro lafi preku o poslanie, obeležinenle hem ma mešinen tumen oleja, za da te ladžal. 15Ama ma računinenle baši dušmani, nego predupredinenle sar phral.
O posledna pozdravia
16A korkori o Gospodari e mireskoro te del tumen mir uvek hem ko sekova način. O Gospodari te ovel sarinencar tumencar!
17Pozdrav mle vasteja, e Pavleskoro: odovaj tano belego ko sekova poslanie, pišinava agjar. 18I blagodat amare Gospodareskiri o Isus Hristos te ovel sarinencar tumencar.