2 Solunjajna 2
O Manuš e Bezzakonieskoro
1Molinaja tumen, phrajljalen, so kerelape lafi baši o ajbe amare Gospodareskoro o Isus Hristos hem baši amaro khediba zaedno ki Leste, 2ma dozvolinen sigate te predomislinen tumen ki tumari godi, nitu te daran ni taro duho, ni taro lafi, ni taro poslanie, sar te phene tano amendar bičhavdo, sar vekje alo e Gospodareskoro dive! 3Nikoj te na hovavel tumen ko bilo savo način, soske odova nae te ovel dži kote prvo na avela o periba hem na pojavinela pes o manuš e bezzakonieskoro, o čhavo e uništibaskoro, 4koj protivinelape hem vazdelape upreder o sa so vakerelape Devel ili sveto, agjar so ka bešel e Devleske ko hrami hem ka prestavinelpe pes deka ovi tano Devel.
5Na setinena li tumen deka vakergjum tumenge akava panda koga sijum sine tumende? 6Hem akana džanena so ačhavkerelale za da te pojavinel pes ov ko plo vreme. 7Soske, vekje kerela buti i tajna baši o bezzakonie, samo koga ka cidelpe ki strana okova, koj akana ačhavkerelala, 8hem togaš ka pojavinel pes o bezzakoniko kas o Gospodari ka mudarele Ple zdiveja taro Plo muj hem ka uništinele odoleja so ka pojavinel pes koga ka avel.
9O ajbe taro bezzakoniko tano sprema o satana sar kerela buti, sekole silaja, hem čudno znakoncar hem hovavne čudoncar, 10hem razno vrsta nepravda so hovavela okolen koj propadinena, soske na prifatinge o mangipe sprema ko čačipe za da te spasinen pes. 11Hem odoleske o Devel ka bičhalel lenge jako zabluda, za da te verujnen ko hovajba, 12hem te oven osudime sarine, koj na poverujnge ko čačipe, a zamangle sine i nepravda.
Tergjoven cvrsto
13A amen sijem dužna uvek te blagodarina e Devleske baši tumenge, phrajljalen, taro Gospodari mangle, soske o Devel izbiringja tumen taro početok baši spasenie, preku osvetuvanje e Duhoskoro hem vera ko čačipe, 14ko kova vikime sijen tumen preku amaro Evangelie, za da te dobinen udel ki slava amare Gospodareskiri o Isus Hristos. 15Togaš, phrajljalen, tergjoven cvrsto hem ikeren o učenje so siklilen len amendar, bilo preku amare lafia ili preku amaro poslanie.
16A korkori o Gospodari amaro o Isus Hristos hem o Devel amaro Dad, Koj zamanglja amen hem dengja amen večno uteha hem šukar nadež pali blagodat, 17te utešinel tumare srcia hem te zojrakerel tumen ko sekova šukar delo hem lafi!