3 Jovanovo

Pozdrav

¹O starešina dži ko manglo Gaj, kas so mangavale ko čačipe. ²Mo manglo, mangava tuke te ovel tuke šukar ko sa hem te ove sasto, sar so hem tano šukar tle dušake.

Pofalba baši sajgija

³Ustvari, but radujngjuma koga ale o phrajlja hem posvedočinge baši tlo čačipe, sar tu džaja ko čačipe. ⁴Baši mange nae pobari radost taro odova: te šunav deka me čhave džana ko čačipe.

⁵Mo manglo, postapineja verno ko sa so kjereja baši o phrajlja, hem odova baši o jabandžie, ⁶koj angli crkva posvedočinge tlo mangipe: ka kjere šukar, ako ispratinejalen palo način, sar soj tano dostojno anglo Devel, ⁷soske putujnena baši Oleskoro anav, na priminge ništo taro narodia. ⁸Hem agjar, amen sijem dužna te primina asavken, za da te ova sorabotnikja baši o čačipa.

O bilačhipa taro Diotref hem o šukaripa taro Dimitrija

⁹Hem pišingjum nešto e crkvake, ama o Diotref, koj mangela te ovel prvo maškar olende, na priminelamen amen. ¹⁰Odoleske ako avava odori, ka potsetinav baši oleskere dejlja, so kjerelalen, napadingjamen bilačhe lafencar, hem na zadovolinelape odoleja, nego korkori na priminela e phralen, a okolenge koj mangena te priminenlen, zabraninela lenge hem goninelalen tari crkva.

¹¹Mo manglo, ma ugledintut ko bilačhipe, nego ko šukaripe. Koj kjerela šukar taro Develi tano; koj kjerela bilačhipa, na dikhlja e Devle.

¹²Baši o Dimitrija sinele svedoštvo taro sarine – hem taro korkoro čačipe. A hem amen svedočinaja; a džaneja deka amaro svedoštvo tano čačikano.

Krajna pozdravia

¹³Sinema te pišinav tuke but, ama na mangava te pišinav tuke mastiloja hem pero, ¹⁴a nadinavama deka ka dikhavtut skoro, hem ka kjera lafi usno. ¹⁵Mir tuja! Pozdravinenatut o prijatejlja! Pozdravin e prijatelen ko anav!