Galatjajna 1
1O Pavle – apostoli, bičhavdo na taro manuša, nitu preku manuša, nego preku o Isus Hristos hem o Devel o Dad, Koj voskresningjale taro mule – 2hem taro sa o phrajlja, koj tane mancar, dži ko crkve ki Galatija. 3Blagodat hem mir ki tumende taro Devel, amaro Dad, hem taro Gospodari o Isus Hristos, 4Koj dengjape pes baši amare grevia, za da te izbavinel amen taro avdisutno bilačho veko, pali vojlja amare Devleskiri hem Dad, 5Oleske neka ovel slava ko sa o vekja. Amin!
Nae javer evangelie
6Čudinava man deka agjar sigate iranena tumen taro Okova, Koj vikingja tumen e Hristoske ki blagodat, hem prenakhena ko javer evangelie, 7kova nae tano javer, samo isi disave, kola buninena tumen hem mangena te iranen e Hristoskoro Evangelie.
8Ama ako hem amen, ili angeli taro nebo, propovedinela tumenge javer evangelie, različno taro okova, so propovedingem tumenge, te ovel prokleto! 9Sar so vakjergem poangle hem akana palem vakjerava: ako nekoj propovedinela tumenge evangelie, so razlikujnelape taro okova so primingenle, te ovel prokleto!
O Pavle e Hristoskoro služiteli
10Dali me akana uverinava e manušen ili e Devle? Ili trudinava man te ugodinav e manušenge? Ako panda bi ugodinavajne e manušenge, nae sine te ovav e Hristoskoro služiteli. 11Soske, izvestinava tumen, phrajljalen, deka o Evangelie, kova propovedingjum, nae tano manušikano, 12soske nitu me primingjumle taro manuš, nitu sikliljumle, nego preku otkrovenie taro Isus Hristos.
13Tumen sekako šungen baši mlo anglutno živiba ko judejstvo; sar but previše maltretirinava hem uništinava sine e Devleskiri crkva. 14Hem ko judejstvo geljum but anglal taro me vrsnikja ko mlo narodo, kova prastava sine prebare silaja baši o običaja amare pradadengiri.
15A koga pali Okoleskiri vojlja sine, Koj biringja man panda taro vogi me dajakoro, hem vikingja man preku Pli blagodat, 16te otkrinel ki mande Ple Čhave, za da te propovedinavle maškar o narodo so nane Evrea, na rodingjum sovet odma ko telo hem ko rat, 17nitu geljum upre ko Erusalim ko okola, kola angleder mande so sine apostojlja, nego geljum poadari ki Arabija hem palem irangjum man ko Damask.
18A palo trin berš geljum upre ko Erusalim, za da te dikhav e Petare, hem ačhiljum ki leste dešupandž dive, 19a nekoj javer taro apostojlja na dikhljum, osven o Jakov, o phral e Gospodareskoro. 20Baši akava so pišinava tumenge, ekje anglo Devel vakjerava deka na hovavava.
21Palo odova, aljum ko thana e Sirijake hem Kilikija. 22A e crkvenge ki Judeja kolaj tane ko Hristos, lično lenge sijum sine panda bipendžardo, 23ola sine samo šunge deka okova, koj nekogaš maltretirinela amen sine, akana propovedinela i vera, koja nekogaš uništinelala sine. 24A baši odova so o Devel kjergja mancar slavinena sine e Devle.