Efesjajna 3

I tajna e Hristoskiri

¹Odoleske me, o Pavle, sijum zatvorniko e Hrista Isuseskoro baši tumenge e narodonge, ²samo ako šungen baši o upravitelstvo baši e Devleskiri blagodat, koja mange tani dendi baši tumenge; ³deka palo otkrovenie sopštimi mange tani i tajna, sar so poangle pišingjum nakratko. ⁴Čitibaja othar šaj te hajljon mo sfakajnje baši i tajna e Hristoskiri, ⁵koja so ko javera pokolenia na sine lenge phendi e manušikane čhavenge, sar so akana preku o Duho tani otkrimi Oleskere sveta apostolenge hem prorokonge: ⁶deka o narodia tane sonaslednikja hem pripadnikja e isto teloske, hem zaedno tane ko Leskoro vetuvanje ko Hristos Isus, preku o Evangelie, ⁷kaske uljum služiteli, spored o dari tari Devleskiri blagodat, koja tani mange dendi spored o delujba tari Oleskiri sila.

⁸Mange – o najtikno taro sa o sveta – dendi tani mange akaja blagodat: te navestinav e narodonge o Evangelie o neistražlivo e Hristoskoro barvalipa ⁹hem sarinenge te rasvetlinav ko so ikjerelape i raspredelba e tajnakiri koja tari večnost sine garavdi ko Devel – o Sozdateli baši o sa; ¹⁰ta i but različno Devleskiri mudrost te otkrinelpe lenge akana preku i crkva e načalstvonge hem e vlastenge ko nebesna thana, ¹¹spored i večno namera, koja kjergjala ko Hristos Isus, amaro Gospodari, ¹²ki Kaste isiamen smelost hem pristap ko Devel, pherde doverbaja – preku i vera ki Leste. ¹³Odoleske molinava tumen te na obeshrabrinen tumen baši mle nevolje, so arakhlema baši tumenge: olaj tumari slava.

E Hristoskoro mangipa nakhavela o džandipa

¹⁴Baši odova perava ko kočaka anglo o Dat amare Gospodareskoro o Isus Hristos, ¹⁵Kastar sekova rodo ki nebesa hem ki phuv dobinela anav; ¹⁶te del tumen, spored o barvalipa tari Pli slava – te zajakninen e silaja preku Oleskoro duho ko manuš andre, ¹⁷ta preku i vera te vselinelpes o Hristos ko tumare srcia: te oven vkorenime hem zasnovime ko mangipe; ¹⁸za da te šaj te svatinen sa e svetiencar, soj tano širina hem dužina, hem učipa hem hor, ¹⁹hem te pendžaren e Hristoskoro mangipa, kova nakhavela o džandipa: za da te ispolninen tumen ki celo e Devleskiri polnota. ²⁰A Okoleske, Koj Ple silaja, so delujnela ki amende, šaj te kjerel prekumerno upreder o sa so amen molinaja ili mislinaja, ²¹Oleske nekaj tano slava ki crkva hem ko Hristos Isus ko sa o pokolenia taro vekja ko vekja! Amin!