Efesjajna 2

Palo blagodat sijen spasime

¹Hem tumen, koj sijen sine mule baši tumare prestapia hem grevia, ²ko kova živinena sine nekogaš spored o veko akale svetoskoro, spored o knez e vozdušno silengoro – o duho, koj delujnela akana maškar o čhave tari nepokornost. ³Maškar akala, hem amenda živingem nekogaš ko amare telesna strastia, kjeraja sine o pohote e teloskere hem ko pomisle hem sijem sine ki priroda čhave e holjakere sar hem o sa javera.

⁴Ama o Devel, Koj tano barvalo ko milost, baši Plo baro mangipe kolaja zamangljamen, ⁵dživde kjergjamen zaedno e Hristoja hem amen, koj sijem sine mule baši amare grevia – pali blagodat sijen spasime! – ⁶hem Oleja voskresningjamen hem Oleja bešakjergjamen ko nebesna thana, ko Hristos Isus, ⁷ta, ko poadari vekja te sikavel o prebaro barvalipe tari Pli blagodat, spored Plo šukaripa ki amende ko Hristos Isus.

⁸Soske palo blagodat sijen spasime, preku vera, hem odova nae tano tumendar korkori – odovaj tano Devlestar poklon! ⁹Nae taro dejlja, za da te na falinelpe nekoj. ¹⁰Ustvari, Leskoro delo sijem, sozdajme ko Hristos Isus, baši šukar dejlja, kola o Devel spremingjalen angleder, za da te živina ki lende.

Ovi tano amaro mir

¹¹Odoleske spomninen tumenge, deka tumen, koj nekogaš sijen sine neznabošcia ko telo, hem vakjerde biobrezime taro okola, kola so vakjerenape obrezime, hem koj tale odova ko telo, palo manušikano delo; ¹²ko odova vreme sijen sine bizo Hristos, dujrarde taro izraelsko opštestvo, hem tugja e zavetenge taro vetuvanje, bizo nadež hem bizo Devel ko sveto. ¹³A akana ko Hristos Isus, tumen koj nekogaš sijen sine dur, ulen paše preku e Hristoskoro rat.

¹⁴Soske Ovi tano amaro mir, Koj taro duj kjergja jek, hem peljargja o pregradimo dzido, so delinelalen sine, ¹⁵hem ko Plo telo uništingja o dušmanluko hem o zakoni oleskere zapovedencar hem odredbe, hem kjergja mir, taro duj te sozdajnel ki Peste jek nevo manuš, ¹⁶hem solduj ko jek telo te pomirinelen e Devleja preku o krsto, otkoga mudargjale upri leste o dušmanluko.

¹⁷Ov alo te propovedinel mir tumenge, koj sijen sine dur hem mir okolenge, koj sine paše: ¹⁸soske preku Leste, hem akala hem o javera, isiamen pristap ko Dat ko jek Duho.

O Hristos amaro agolno bar

¹⁹Odoleske, tumen na sijen vekje jabandžie hem strancia, nego sijen sogragjajna e svetiengere hem o kherutne e Devleskere, ²⁰naddzidime upri osnova e apostolengiri hem e prorokongiri, a o agolno bar tano korkori o Hristos Isus, ²¹upri Kaste celo strojno sostajmi zgrada bajrola ko sveto hrami ko Gospodari, ²²upri Kaste hem tumenda ko Duho zaedno sodzidinena tumen e Devleske ko živealište.