Jakov 4
Rodena ama na dobinena
1Kotar tane o vojne hem kotar tane o borbe maškar tumende? Na avena li taro tumare strasna želbe, so marenapes ko tumare člejna? 2Mangena hem naetumen, mudarena hem zavidinena, hem našti te doresen; marena tumen hem voinena. Naetumen, soske na molinena. 3Rodena, ama na dobinena, soske rodena pogrešno, za da te trošinen ko tumare strasna želbe.
4Preljubnikja, na džanena li deka o amalipa e svetoja tano dušmanluko protiv o Devel? Hem agjar, koj mangela te ovel amal e svetoja ovela dušmani e Devleske. 5Ili mislinena li deka o Sveto Pismo vakjerela ko čučo: ‘Bare silaja mangelale e duho koj živinela ki amende‘? 6Ama dela pobari blagodat. Odoleske vakjerela:
‘O Devel protivinelape baši ko bare soj tane,
a e smirimenge delalen blagodat.’
Aven paše tumen ko Devel
7Hem agjar, pokorinen tumen e Devleske; a protivinen tumen e bengeske hem ka našel tumendar. 8Aven paše tumen ko Devel, hem Ov ka avel paše ki tumende; isčistinen tumare vasta, grešnikja, hem očistinen tumare srcia, manuša ulavde dušaja! 9Oven nažalime, tugujnen, hem roven: tumaro asajbe neka pretvorinelpes ki tuga, a o radost ko žalost! 10Oven ponizna anglo Gospodari, hem Ov ka vazdel tumen!
11Ma kjeren bilačhe lafi jek jekeja, phrajljalen; koj kjerela lafi protiv taro po phral ili sudinelale pe phrale, kjerela lafi protiv o zakoni hem sudinela e zakone. A ako sudineja o zakoni, na sijan izvršiteli e zakoneskoro, nego oleskoro sudija. 12Samo jek tano Zakonodavco hem Sudija, Koj šaj hem te spasinel hem te uništinel. A koj sijan tu, so osudineja tle paše?
Ma falinen tumen ko tumaro baripe
13Šunen akana tumen, koj vakjerena: „Avdije ili tajsa ka dža ki okoja ili odoja diz, hem adari ka ačhova jek berš, hem ka kjera trgovija hem ka spečalina,“ 14tumen koj na džanena so ka ovel tajsa: soske, soj tano tumaro životo? Tumen sijen parea, koja javinelapes ko momenti, hem palo odova našagjovela.
15Mesto te vakjeren: „Ako o Gospodari mangela, ka živina hem ka kjera akava ili okova,“ 16tumen akana falinena tumen ko tumaro baripe. Sekoja asavki falba tani bilačhe. 17Hem agjar, koj džanela te kjerel šukar, a na kjerela, grevo tano oleske.