Jakov 3

I čhip tani jag

¹Ma oven, mle phrajljalen, but tumendar učitejlja, soske džanaja deka ka ova postrogo osudime baši odova. ²Soske sarine amen grešinaja but. Ako nekoj na grešinela ko kjeriba lafi, ovi tano sovršeno manuš, sposobno te kontrolirinel hem celo plo telo.

³Hem koga e grastenge čhivaja uzde ko muj, za da te pokorinenpes amenge, hem šaj te upravina celo olengere teloja. ⁴Ekje, hem o brodia, iako tane doborom bare hem tane gonime taro silna bavlala, olencar upravinela but tikni krmička, kote so mangela e kormiloskiri vojlja.

⁵Agjar hem i čhip tano tikno členi, ama falinelapes bare bukjencar. Ekje, sar tikni jag tharela bari šuma! ⁶Hem i čhip tani jag, sveto e nepravdakoro; i čhip arakhljagjovela maškar amare člejna: mejljakjerela celo telo hem, potpalimo taro pekol, tharela celo amare životoskoro.

⁷Soske, sekova vid dzvejra hem čiriklja, lazačia hem morska životnia, skrotinenapes hem tane skrotime taro manušikano rodo, ⁸ama nikoj taro manuša našti te skrotinel i čhip, nemirno bilačho, pherdo smrtonosno otroveja.

⁹Oleja blagoslovinaja amare Gospodare hem Dade, hem oleja armajna daja e manušen koj tane sozdajme spored e Devleskoro sličnost. ¹⁰Taro isto muj ikljola blagoslov hem arman. Odova na smejnela, mle phrajljalen, te ovel agjare. ¹¹Thavdela li taro izvor, taro isto otvor, gudlo hem kjerko pani? ¹²Šaj li, mle phrajljalen, i smokva te bijanel maslinke, ili loza smokve? Agjar ni o londalo izvor našti te del gudlo pani.

I mudrost upraldan

¹³Koj tano maškar tumende mudro hem gogjaver? Šukar vladibaja neka sikavel ple dejlja ki mudro smirenost. ¹⁴Ako li palem ko tumare srcia isitumen kjerki zavist hem akošibe, ma falinen tumen hem ma hovaven protiv o čačipe!

¹⁵Odova nae tano mudrost, koja hulela upraldan, nego tani tari phuv, duševno, demonsko, ¹⁶soske kote tani i zavist hem o akošiba, odothe tano o nered hem sekova bilačhe nešto.

¹⁷A i mudrost koja avela upraldan, angleder o sa tani: čisto, palo odova miroljublivo, gudli, pokorno, pherdi milosteja hem šukar plodia, na dikhela koj tano koj, hem nadujmujalo. ¹⁸A o plodi e pravdakoro sejnelapes ko mir, taro okola koj sozdajnena mir.