Luka 6

O Isus Gospodari e Sabotakoro

¹Desingja pes ki dujto glavno sabota, te nakhel maškar i niva, a Oleskere učenikja čhinena sine giv, trebinenale vastenar hem hana sine. ²A nekoj taro farisea vakerge: „Soske kerena odova, so nae tano dozvolimo te kerelpe ko sabotna dive?“

³O Isus odgovoringja hem vakergja lenge: „Zarem na čitingen so kergja o David koga bokhalilo ov hem odola, so sine oleja? ⁴Hem sar khugja e Devleske ko kher, lelja o čhivde mare hem halja, hem dengja len hem okolen, koj sine oleja, so nikaske nae tano dozvolimo te han, a samo o sveštenikja.“

⁵Hem vakergja lenge: „O Manušikano Čhavo tano Gospodari hem e Sabotakoro.“

⁶A ki jek javer sabota khugja ki sinagoga hem sikavela len sine, a odothe sine hem jek manuš, kaskoro desno vas sine šukilo. ⁷A o knižnikja hem o farisea dikhenale sine – dali ka lečinel ki sabota – za da te šaj te kerenle krivo.

⁸A Ov džanela sine olengere misle hem vakergja e manušeske so sine e šuke vasteja: „Ušti hem ispravin tut ko maškar!“ Hem uštilo hem isprajngjape.

⁹A o Isus vakergja lenge: „Pučava tumen: soj tano dozvolimo te kerelpe ki sabota: šukar ili bilačhe? Te spasinelpe životo ili te uništinelpe?“ ¹⁰Hem dikhlja sarinen naokolu hem vakergja leske: „Pružin to vas!“ A ov kergja agjar, hem o vas leskoro ulo sasto sar o javer.

¹¹A ola pherdile holjaja hem dogovorinenape sine maškar peste so bi šaj te keren Leske e Isuseske.

O Isus izbirinela e učenikon

¹²Ko odola dive uklilo ki gora, za da te molinelpe; hem nakhlja i rat, molibaja e Devle. ¹³A koga disilo avrijal, vikingja Ple učenikon hem olendar izbiringja dešuduj džene, kola hem vakergja len apostojlja: ¹⁴o Simon, kas so vakergjale hem Petar, hem o phral leskoro o Andrej; o Jakov hem o Jovan; o Filip hem o Vartolomej; ¹⁵o Matej hem o Toma; o Jakov e Alfejeskoro hem o Simon, vakerdo Zilot; ¹⁶o Juda e Jakoveskoro hem o Juda Iskariotski, koj ulo hem predavniko.

Bari gužva ali te šunel e Isuse hem te lečinenpe

¹⁷Hem koga hulilo, zaedno olencar, hem ačhilo ko jek ramno than, hem bari gužva Leskere učenikja hem bari gužva narodo tari celo Judeja hem taro Erusalim, taro Tirsko hem Sidonsko primorje, ¹⁸koj ale te šunenle hem te lečinenpe taro ple nasvalipa, hem saskjovena sine hem okola, koj sine mučime taro nečista duhia. ¹⁹Hem celo narodo mangela sine te doprinelpe dži ki Leste, soske Olestar ikljovela sine sila hem lečinela sine sarinen.

²⁰Hem Ov vazdingja Ple jajkha ko Ple učenikja hem vakergja:

²⁷Ama, tumenge koj šunena – vakerava tumenge: Mangen tumare dušmanen; keren lenge šukar okolenge, koj mrzinena tumen. ²⁸Blagoslovinen len okolen koj armajna dena tumen; molinen tumen baši okola koj navredinena tumen. ²⁹Okova, koj ka khuvel tut ki ti čham, hem i javer iran leske; hem odova koj lelja ti nametka dele hem to gad. ³⁰Dele sekole, koj rodela tutar. Hem ma rode palal soj tlo olestar, koj lela tutar. ³¹Hem sar so mangena te keren tumenge o manuša tumenge, agjar keren hem tumen olenge.

³²Hem ako mangena okolen, koj mangena tumen, savi tani tumari blagodarnost? Hem o grešnikja mangena okolen koj mangena olen. ³³Hem ako kerena lenge šukar okolenge, koj tumenge kerena šukar, savi tani tumari blagodarnost? Hem o grešnikja kerena odova isto. ³⁴Hem ako dena okolenge kastar so nadinena tumen deka ka iranen tumenge, savi tani tumari nagrada? Soske hem o grešnikja dena e grešnikonge za da te iranelpe lenge isto.

³⁵Nego, mangen tumare dušmanen, keren lenge šukar hem den len bizo te udžaren nešto. Hem tumari nagrada ka ovel bari hem ka oven čhave e Najbareskere, soske Ovi tano gudlo ko neblagodarna hem bilačhe. ³⁶Oven milostiva sar soj hem tumaro Dad tano milostivo.

³⁷Hem ma sudinen hem nae te oven sudime; hem ma osudinen hem nae te oven osudime. Prostinen hem ka ovel tumenge prostimo! ³⁸Den hem ka delpe tumenge: šukar merka – nabimi, natresimi, prepherdi, ka ovel tumenge dendi ki angali, soske save merkaja merinena, asavkaja ka merinel pes tumenge.“

³⁹A vakergja lenge hem parabola: „Šaj li o korolo te vodinel e korole? Zar nae te peren solduj džene ki dupka? ⁴⁰Nae učeniko upreder plo učiteli, sekoj koj ka usovršinelpe ka ovel sar leskoro učiteli.

⁴¹A soske dikheja i deljanka ki jak tle phraleske, a na dikheja i greda ki ti jak? ⁴²Sar šaj te vakere te phraleske: ‘Phrala, muk me te ikavav i deljanka tari tli jak!’ a korkori na dikheja i greda ki tli jak? Licemerno, ikav najprvo i greda tari tli jak, pa togaš ka dikhe sar te ikave i deljanka tari jak tle phraleskiri!

⁴³Nane šukar kaš so dela bilačho plodi; nitu bilačho kaš so dela šukar plodi. ⁴⁴Soske sekova kaš pendžarelape palo plo plodi. Na khedenape smokve taro kare, nitu drakha tari kapina. ⁴⁵O šukar manuš, so isile barvalipe ko srce, ikavela šukar, a taro bilačho so isile bilačhipe ko srce ikavela bilačhipe, soske oleskoro muj kerela lafi taro okova, so pherelale oleskoro srce.

⁴⁶Hem soske vikinena Man ‘Gospodar! Gospodar!’ a na kerena odova, so vakeravale? ⁴⁷Sekoj koj avela ki Mande hem šunela Mle lafia, hem ispolninela len, ka vakerav tumenge kaste tano slično. ⁴⁸Slično tano ko manuš, koj kerela kher: ranlja hor hem čhigja temejlja ko bar, hem koga ulo poplava i reka geli ko kher, ama našti sine te pomrdinele, soske sine šukar kerdo o kher.

⁴⁹A koj šunela a na ispolninela, priličinela ko manuš, koj kergja kher ki phuv, bizo temejlja. I reka geli ko kher, hem ov pelo odma, hem o periba odole khereskoro sine baro.