O Juda gelo ko prvosveštenikja za da te predajnele

¹A sine duj dive dži ki Pasha hem dži ko prazniko e bizokvasecengere mare. Hem o glavna sveštenikja hem o knižnikja rodena sine sar te astarenle ko hovajba hem te mudarenle, ²ama kerena sine lafi: „Na ko prazniko, za da ma te buninel pes o narodo.“

³Hem koga sine ki Vitanija, ko kher e Simoneske o leprozno, dži kote sine pružimo uza ki sofra, ali jek romni, koja sinela čaro taro alabaster, čisto skapoceno nardovo miro; oj phaglja o čaro taro alabaster hem čhorgja o miro upro Oleskoro šero.

⁴A nekoj na soglasinelape sine, vakeribaja maškar peste: „Soske te rasturinelpe agjar o miro! ⁵Ustvari, o miro šaj sine te ovel bikimo baši poviše taro trišel denarii hem te del pes e čorolenge!“ Hem lele te keren lafi protiv late.

⁶Ama o Isus vakergja: „Mukenla! Soske dosadinenala? Oj kergja šukar delo Mange. ⁷Soske e čorolen isi tumen sekogaš tumencar, hem šaj te keren šukar koga ka mangen; a Mande nae tumen sekogaš. ⁸Oj kergja so šaj sine; pomazingja predvreme Mlo telo baši parubaske. ⁹Hem čače vakerava tumenge, kote hem da te ovel propovedimo o Evangelie, ko celo sveto, ka vakerel pes hem so kergja oj, baši lakoro spomen.“

¹⁰Hem o Juda Iskariotski, jek taro Dešuduj Džene, gelo ko prvosveštenikja, za da te predajnele lenge. ¹¹A ola, koga šunge, radujnge pes hem obečinge leske te denle srebrenikja. Hem rodela sine šukar momenti, za da te predajnele.

I posledno večera

¹²A ko prvo dive ko bizokvasecengere mare, koga čhinena sine baši Pasha, Oleskere učenikja vakerge Leske: „Kote mangeja te dža hem te spremina baši te ha i Pasha?“

¹³Bičhagja dujen taro Ple učenikja hem vakergja lenge: „Džan ki diz hem ka arakhel tumen manuš, koj ingarela pani ko bukali. Džan pali leste ¹⁴hem kote ka khuvel, vakeren e domakineske: ‘O učiteli pučlja: „Kote tani Mli soba, kote ka havla i Pasha Mle učenikoncar?“’ ¹⁵Hem ov ka sikavel tumenge bari soba ko upruno kati, buljardi, spremimi; čhiven amenge othe te ha!“

¹⁶Hem Oleskere učenikja iklile hem gele ki diz, hem arakhle sar so Ov vakergja lenge, pa spreminge i Pasha.

¹⁷A koga ratilo, alo e Dešuduje Dženencar. ¹⁸Hem koga sine pružime uzi sofra hem hana sine, o Isus vakergja lenge: „Čače vakerava tumenge, jek tumendar – koj hala Mancar – ka predajnel Man.“

¹⁹Ola rastužingepe hem počminge te vakeren Leske jek po jek: „Tena sijum me?“ A javer: „Dali me?“

²⁰A Ov vakergja lenge: „Jek taro Dešuduj Džene koj bolela Mancar ki činija. ²¹O Manušikano Čhavo džala peske, sar soj tano pišimo baši Leske; ama kerko odole manušeske, preku kaste o Manušikano Čhavo ka ovel predajmo. Pošukar bi ovela leske odole manušeske, te na bijangjovel.

²²Hem koga hana sine, lelja maro, blagoslovingja, phagljale, hem razdelingja lenge: „Len, han, akavaj tano Mlo telo.“

²³Hem lelja i čaša, zablagodaringja hem dengjala lenge; hem sarine pile olatar. ²⁴Hem vakergja lenge: „Akavaj tano Mlo rat e Neve Zaveteskoro, kova čhorgjola baši bute dženenge. ²⁵Čače vakerava tumenge: nae vekje te pijav taro e lozakoro plodi dži ko odova dive, koga ka pijav nevo e Devleske ko Carstvo.“

Molitva ki Getsimanija

²⁶Hem otkoga giljage gili, iklile ki Maslinova Gora.

²⁷Hem o Isus vakergja lenge: „Sarine ka soblazinen tumen, soske tano pišimo:

‘Ka khuvav e Pastire,
hem o bakhre ka raznašen.’

²⁸A palo Mlo voskresenie, ka džav angleder tumende ki Galileja.“

²⁹A o Petar vakergja Leske: „Ako hem sarine soblazninena pes, ama me – na.“

³⁰Hem o Isus vakergja leske: „Čače vakerava tuke, deka tu avdije, ki akaja rat, angleder o bašno te bašel duj puti, trin puti ka odrečine tut Mandar.“

³¹Ama ov panda pouporno vakerela sine: „Ako trebela hem te merav Tuja, nae te odrečinav man Tutar!“ Hem sarine vakerena sine isto.

³²Hem ale dži ko than ko anav Getsimanija, hem vakergja lenge Ple učenikonge: „Bešen akate, dži kote molinava Man.“

³³Hem lelja Peja: e Petre, e Jakove hem e Jovane, tužnisalilo, hem počmingja hor te voznemirinel pes. ³⁴Hem vakergja lenge: „Mli duša tani nažalimi dži ko meriba; ačhoven akate hem bešen pazinen!“

³⁵Hem gelo hari podur, pelo ki phuv hem molinelape sine – ako tano možno – te nakhele odova saati, ³⁶hem vakerela sine: „Abba, Mo Dad! Saj tano možno baši Tuke. Cide Mandar akaja čaša! Ama na sar Me so mangava, nego sar Tu!“

³⁷Hem alo hem arakhlja len sar sovena, hem vakergja e Petreske: „Simone, soveja li! Našti li sine te ove džangavdo jek saati! ³⁸Bešen pazinen hem molinen tumen, za da ma te peren ko iskušenie! O duho mangela, ama o telo tano slabo.“

³⁹Hem palem gelo hem molingja pes, vakeribaja i isto molitva. ⁴⁰Koga irangja pes, palem arakhlja len sar sovena, soske o jajkha lengere sine phanljona hem na džanena sine so te odgovorinen Leske.

⁴¹Hem alo trito puti hem vakergja lenge: „Panda li sovena hem odmorinena? Dostaj tano, o saati alo! Ekje, predajnenale e Manušikane Čhave ko grešna vasta. ⁴²Ušten, te dža! Ekje alo paše Mlo predavniko!“

⁴³Hem odma, dži kote Ov panda kerela lafi sine, alo o Juda – jek taro Dešuduj Džene, hem oleja bari gužva, mačencar hem kaštencar; bičhavde taro glavna sveštenikja, knižnikja, hem starešine.

⁴⁴A Oleskoro predavniko sine dengja len znako, vakeribaja: „Kas ka čuminavle, Ovi tano; astarenle Ole hem ingarenle pazindor.“ ⁴⁵Hem koga alo, odma gelo Leske paše hem vakergja: „Ravi! Ravi!“ hem čumingjale tato.

⁴⁶A ola čhige vasta ki Leste hem astargele. ⁴⁷A jek taro okola, koj tergjona sine odothe, ikagja mači hem khugja e prvosveštenikoskere sluga hem čhingja o kan leskoro.

⁴⁸O Isus pak odgovoringja hem vakergja lenge: „Iklilen sar razbojnikoske, mačencar hem kaštencar, za da te astaren Man! ⁴⁹Sekova dive sijum sine tumencar ko Hrami hem poučinava sine, ama na astargen Man. Ama, o Pismia trebela te ispolningjoven!“

⁵⁰Togaš, sarine muklele hem našle. ⁵¹A pali Leste džala sine jek terno manuš, pakjardo čaršafeja ko nango telo, hem astargele ole; ⁵²ama ov muklja o čaršafi hem našlja nango olendar.

O Isus anglo o Sinedrioni

⁵³Hem ingarge e Isuse ko prvosvešteniko, hem khedinge pes sa o glavna sveštenikja, starešine hem knižnikja. ⁵⁴A o Petar sledinelale sine duraldan sa dži ko dvoro e prvosveštenikoskoro. Odothe bešela sine e slugencar hem takjola sine uzi jag.

⁵⁵A o prvosveštenikja hem o celo Sinedrioni rodena sine svedoštvo protiv o Isus, za da te mudarenle, ama na arakhle. ⁵⁶Soske but džene svedočinena sine hovavno protiv Oleste, ama o svedoštvia na sine ista.

⁵⁷Hem nekoj uštile hem svedočinena sine hovavno protiv Oleste, vakeribaja: ⁵⁸„Amen šungemle sar vakerela sine: ‘Ka rušinav akava vastencar kerdo Hrami hem baši trin dive ka gradinav javer – bivastencar kerdo.’“ ⁵⁹Ama ni agjare olengoro svedoštvo na sine isto.

⁶⁰Togaš o prvosvešteniko uštilo ko maškar hem pučljale e Isuse, vakeribaja: „Ništo li na odgovorineja? So svedoštvinena akala protiv Tute?“

⁶¹A Ov kjutinela sine hem ništo na odgovoringja.

O prvosvešteniko pučljale palem: „Tu li sijan o Hristos, o Čhavo e Blagoslovimeskoro?“

⁶²A o Isus vakergja: „Me sijum. Hem tumen ka dikhen e Manušikane Čhave, sar bešela oddesno e Silatar hem sar avela e nebesno oblakoncar!“

⁶³Togaš o prvosvešteniko pharagja ple šeja hem vakergja: „Soske potrebno amenge vekje svedokja? ⁶⁴Šungen bogohulstvo! Sar dikhjola tumenge?“

A ola sarine osudingele deka zaslužinela meriba.

⁶⁵Hem nekoj počminge te čhungarenle hem te učharen o muj Leskoro, te khuvenle boksencar hem te vakeren Leske: „Prorokujn!“ Hem o sluge khuvenale sine šamarkencar.

O Petar odrečinelape

⁶⁶Hem koga o Petar sine tele, ko dvoro, ali jek taro sluginke e prvosveštenikoskere; ⁶⁷hem koga dikhlja e Petre, sar takjola, dikhljale hem vakergja leske: „Hem tuda sijan sine e Isuseja o Nazareco!“

⁶⁸Ama ov odrečingja, vakeribaja: „Nitu džanava, nitu hajljovava so vakereja!“ Hem iklilo avrijal anglal ko dvoro hem o bašno bašlja.

⁶⁹A i sluginka dikhljale hem počmingja palem te vakerel okolenge, koj tergjona sine odothe: „Hem akavaj tano olendar!“

⁷⁰A ov palem odrečingja.

Pokasno, okola, koj tergjona sine odothe, palem vakerge e Petreske: „Čače sijan olendar, soske hem tuda sijan Galilejco, a hem o keriba lafi složinela pes.“

⁷¹A ov počmingja te delpe sovel hem te asokerelpe: „Na džanavale e manuše baši Kaste vakerena!“ ⁷²Hem odma o bašno bašlja po dujto puti.

A o Petar setingjape ko lafia, so vakergja leske o Isus: „Angleder o bašno te bašel duj puti, trin puti ka odrečine tut Mandar.“ Hem počmingja te rovel.