O Mesija khuvela ko Erusalim

¹A koga nakhlja i sabota, i Marija Magdalena, i Marija e Jakoveskiri hem i Saloma kinge mirisia, za da te aven hem te makhenle. ²Hem but rano, ko prvo dive e nedelakoro, ale ko grobo koga iklilo o kham. ³Hem kjerena sine lafi maškar peste: „Koj ka premestinel amenge o bar taro vudar e groboskoro?“ ⁴Hem koga dikhle, dikhle deka o bar tano premestimo. Ustvari, sine but baro.

⁵A koga khuge ko grobo, dikhle terno ko dugačko parne šeja, sar bešela desno hem začudingepes. ⁶Ama ov vakjergja lenge: „Ma daran! Tumen rodena e raspnime o Isus Nazareco. Voskresningja! Nae tano akate! Ekje tano o than, kote so čhigele. ⁷Nego džan hem vakjeren lenge Oleskere učenikonge, hem e Petreske, deka Ov gelo angleder tumende ki Galileja; odothe ka dikhenle, sar so vakjergja tumenge.“

⁸A ola iklile hem našle taro grobo, soske lele te tresinen hem te daran. Hem nikaske ništo na vakjerge, soske darana sine.

⁹A koga voskresningja rano, ko prvo dive e nedelakoro, javingjapes prvo e Marija Magdalenake, kolatar sine paldingja evta demojna. ¹⁰Oj geli hem javingja olenge okolenge, koj sine Oleja, koj tugujnena sine hem rovena. ¹¹A ola, koga šunge dekaj tano dživdo hem deka oj dikhljale – na verujnge.

¹²Palo odova javingjape lenge ko javer liko, duje dženenge olendar, ko drumo, koga džana sine ko gav.

¹³Hem ola gele hem javinge olenge e javerenge, ama hem olenda na verujnge.

I apostolsko misija hem o voznesenie e Isuseskoro

¹⁴Najposle javingjape lenge hem e Dešujeke Dženenge, dži kote sine uzi sofra, hem ukoringjalen baši olengoro neverie hem zakoravenost e srceskoro, soske na poverujnge olen okolen, koj dikhlele voskresnimo.

¹⁵Hem vakjergja lenge: „Džan ko celo sveto hem propovedinenle o Evangelie ko sekova sozdanie! ¹⁶Koj ka poverujnel hem krstinelapes, ka ovel spasimo; a koj na poverujnela, ka ovel osudimo. ¹⁷A akala znakja ka oven olencar, okola koj poverujnge: ko Mlo anav ka palden demojna; ka kjeren lafi neve čhibja; ¹⁸ka astaren sapa; ako pijena hem nešto smrtonosno – nae te povredinelen. Ka čhiven vasta ko nasvale hem ola ka saskjoven.“

¹⁹A o Gospodari o Isus, otkoga vakjergja lenge odova, voznesisalilo ko nebo hem bešlja desno ko Devel.

²⁰A o učenikja gele hem počminge te propovedinen segde, o Gospodari sine olencar hem preku o čudia so ola kjerenalen sine, potvrdinela sine deka odova so vakjerenale tano čače.