Matej 1

O rodoslov e Isuse Hristoskoro

¹Lil taro rodoslov e Isuse Hristoskoro, čhavo Davideskoro, čhavo Avraameskoro:

²e Avraameske bijasalilo o Isak, e Isakoske bijasalilo o Jakov, e Jakoveske bijasalile o Juda hem oleskere phrajlja. ³E Judaske bijasalile o Fares hem o Zara tari Tamara, e Fareseske bijasalilo o Esrom, a e Esromeske bijasalilo o Aram, ⁴e Arameske bijasalilo o Aminadav, e Aminadaveske bijasalilo o Nason, e Nasoneske bijasalilo o Salmon; ⁵e Salmoneske bijasalilo o Vooz tari Rava, e Voozeske bijasalilo o Ovid tari Ruta, e Ovideske bijasalilo o Jesej; ⁶e Jesejeske bijasalilo o caro David. E caroske e Davideske bijasalilo o Solomon tari e Urijaskiri romni. ⁷E Solomoneske bijasalilo o Rovoam, e Rovoameske bijasalilo o Avija, e Avijaske bijasalilo o Asa, ⁸e Asaske bijasalilo o Josafat, e Josafateske bijasalilo o Joram, e Jorameske bijasalilo o Ozija, ⁹e Ozijaske bijasalilo o Joatam, e Joatameske bijasalilo o Ahaz, e Ahazeske bijasalilo o Ezekija, ¹⁰e Ezekijaske bijasalilo o Manasija, e Manasijaske bijasalilo o Amon, e Amoneske bijasalilo o Josija, ¹¹e Josijaske bijasalile o Jehonija hem oleskere phrajlja ko vreme preselibaskoro ko Vavilon.

¹²Pali Vavilonsko preselba, e Jehonijaske bijasalilo o Salatiel, e Salatieleske bijasalilo o Zorovavel, ¹³e Zorovaveleske bijasalilo o Avijud, e Avijudeske bijasalilo o Elijakim, e Elijakimeske bijasalilo o Azor, ¹⁴e Azoreske bijasalilo o Sadok, e Sadokeske bijasalilo o Ahim, e Ahimeske bijasalilo o Elijud, ¹⁵e Elijudeske bijasalilo o Eleazar, e Eleazareske bijasalilo o Matan, e Mataneske bijasalilo o Jakov, ¹⁶e Jakoveske bijasalilo o Josif, o rom e Marijakoro, koj bijangja e Isuse, vakjerdo Hristos*.

¹⁷Hem agjar sa o rodovia taro Avraam dži ko David tale dešuštar rodovia; hem taro David dži ki preselba ko Vavilon dešuštar rodovia; hem i preselba ko Vavilon dži ko Hristos dešuštar rodovia.

E Isuseskoro bijanibe

¹⁸A o bijanibe e Isuse Hristoskoro ulo agjar: koga Oleskiri daj i Marija sine verimi e Josifeske, angleder te oven zaedno, arakhlisalili khamni taro Sveti Duh. ¹⁹A olakoro rom o Josif, soske sine pravedno hem na mangela sine javno te ladžakjerela, mislingja te mukela tajno.

²⁰Ama štom pomislingja odova, ekje, e Gospodareskoro angeli javingjape leske ko suno hem vakjergja leske: „Josif, čhavo e Davideskoro, ma dara te le e Marija, te romnja, soske o začnimo ki olate tano taro Sveti Duh. ²¹Oj ka bijanel Čhavo hem tu ka dele o anav Isus*, soske Ov ka spasinel Ple narodo taro olengere grevia.“

²²A sa odova ulo za da te phergjol okova, so o Gospodari vakjergja preku o proroko, koj vakjerela: ²³‘Ekje, čhaj ka ačhol khamni hem ka bijanel Čhavo, hem ka vakjerenle Emanuel,’ kova ko prevod značinela: ‘O Devel amencar!’

²⁴A koga o Josif džangavdilo taro suno, kjergja sar so zapovedingja leske e Gospodareskoro angeli, lelja pe romnja. ²⁵Ama o Josif zapazingja e Marija sar čhaj sa dži kote oj na bijangja Čhavo, Kaske ov dengjale o anav Isus.

*Stiho 16: O Hristos ko grčki značinela Mesija, ili Pomazaniko. *Stiho 21: O anav Isus značinela „O Gospodari spasinela.“