Romano Prevod Tari Biblija
AA

Matej 2

O ajbe e mudrecongoro te pokloninenpes

1A koga o Isus bijasalilo ko Vitleem Judejsko, ko dive e caroskere o Irod, ekje, mudrecia taro istok resle ko Erusalim, 2hem vakjerge: „Kaj tano Ov koj bijasalilo, o Caro e Judejcongoro? Soske dikhlem Oleskiri čereni ko istok hem alem te pokloninamen Oleske.“

3Koga šungja odova, o caro o Irod voznemiringjapes, hem celo Erusalim oleja. 4Hem khedingja sa e glavno sveštenikon hem o narodna knižikja hem pučelalen sine kote trebela te bijangjovel o Hristos.

5A ola vakjerge oleske: „Ko Vitleem Judejsko, soske o proroko pišingja agjar:

6‘Hem tu, Vitleeme, phuv Judino,
nisar na sijan potikno maškar o Judina prvencia,
soske tutar ka ikljol Vladeteli,
Koj ka ovel Pastiri Mle narodoske o Izrael.’“

7Togaš o Irod povikujngja tajno e mudrecon hem vnimatelno siklilo olendar o vreme, koga pojavingjapes i čereni, 8hem bičhagjalen ko Vitleem vakjergja lenge: „Džan hem pučen tumen sa točno baši o Čhavo, hem koga ka arakhenle, javinen mange, za da te avav hem meda te pokloninaman Oleske.“

9Ola, otkoga šungele e caro, cidinge, hem ekje, i čereni, so dikhlela ko istok, džala sine anglo lende džikote na ali hem ačhili upro than kote sine o Čhavo. 10Hem koga dikhle i čereni, radujngepes but bare radosteja. 11Hem koga khuge ko kher, dikhle e Čhave Oleskere dajaja i Marija, hem pele ničkum hem pokloningepes Leske; phrage pumare sandukja hem dengele dajra: zlato, temjan hem smirna.

12Hem otkoga sine predupredime taro Devel ko suno, te na iranenpes ko Irod, gele palo javer drumo pumare phuvjate.

O našiba ko Egipet hem o iraniba

13A koga gele peske ola, ekje, e Gospodareskoro angeli javingjapes e Josifeske ko suno hem vakjergja oleske: „Ušti, le e Čhave, hem Oleskere daja, hem naš ko Egipet, hem ačhov odori džikote na vakjerava tuke, soske o Irod ka rodele e Čhave za da te mudarele.“

14Hem ov uštilo, lelja e Čhave hem Oleskere daja rakjate, hem gele ko Egipet, 15hem odori sine džiko e Irodeskoro meribe; za da te phergjovel o vakjerdo taro Gospodari preku o proroko koj vakjerela: ‘Taro Egipet povikujngjumle Mle Čhave.’

16Togaš o Irod, koga dikhlja deka o mudrecia hovagele, holjangja but, pa bičhagja te oven mudarde, ko Vitleem hem ki celo oleskiri okolina, sa o murša čhave taro duj berš hem potikne, spored o vreme so doznajngja točno taro mudrecia. 17Togaš pherdilo o vakjerdo taro proroko Eremija koga vakjergja:

18‘Glaso šungjapes ko Rama,
rojbe hem vikiba baro;
i Rahela rovela ple čhaven,
hem na mangela te smirinelpes,
soske nae tale.’

19A koga mulo o Irod, ekje, e Gospodareskoro angeli javingjapes e Josifeske ko suno, ko Egipet, 20hem vakjergja oleske: „Ušti, le e Čhave hem Oleskere daja hem dža ki phuv izraelsko, soske mule okola koj rodena sine i duša e Čhaveskiri.“

21Hem ov uštilo, lelja e Čhave hem Oleskere daja, hem alo ki phuv izraelsko. 22Ama koga šungja deka ki Judeja carujnela o Arhelaj, mesto o dat leskoro o Irod, darandilo te džal odori; nego predupredimo taro Devel ko suno gelo ko predejlja Galilejska; 23hem otkoga alo selingjapes ki diz vakjerdi Nazaret, za da te phergjovel o vakjerdo taro prorokja deka ka vakjerelpes Nazareco.