E Isuseskoro voskresenie

¹A pali sabota, karši sabaleskoro ko prvo kurkeskoro dive, ali i Marija Magdalena hem i javer Marija te dikhen o grobo.

²Hem ekje, ulo baro zemjotres, soske e Gospodareskoro angeli hulilo taro nebo, alo hem pomestingja o bar hem bešlja ki leste. ³A o muj leskoro svetinela sine sar molnja, a oleskere šeja – parne sar jiv. ⁴Tari dar angli leste, o stražajra tresinenajne hem ule sar mule.

⁵Togaš o angeli vakjergja e romnenge: „Tumen ma daran! Soske džanava deka rodena e Isuse Koj sine kovimo. ⁶Nae akate, soske voskresningja, sar so vakjergja! Aven hem dikhen o than kote so pašljola sine. ⁷Džan sigate hem vakjeren Oleskere učenikonge deka voskresningja taro mule, hem ekje, Ov džala angleder tumende ki Galileja. Odothe ka dikhenle! Ekje, vakjergjum tumenge.“

⁸Hem ola iklile odma taro grobo, daraja hem bare radosteja, hem prastandile te vakjeren Oleskere učenikonge. ⁹Hem ekje, o Isus arakhlja len hem pozdravingja len: „Radujnen tumen!“ A ola ale paše ki Leste, astarge Oleskere pre hem pokloninge pes Leske. ¹⁰Togaš o Isus vakjergja lenge: „Ma daran! Džan hem vakjeren Me phralenge, te džan ki Galileja; hem odothe ka dikhen Man.“

¹¹A koga džana sine, ekje, nekoj taro stražajra ale ki diz hem vakjerge e prvosveštenikonge baši sa so ulo. ¹²Togaš o prvosveštenikja kjerge pes lafi e starešinencar, hem odlučinge te den e vojnikonge but pare ¹³hem vakjerge olenge: „Vakjeren deka Oleskere učenikja ale rakjate hem čorgele, dži kote amen sovaja sine. ¹⁴Hem ako baši akava šunela o upraviteli, amen ka ubedinale hem ka kjera tumen te na ovel tumen problemi.“

¹⁵A ola lele o pare hem kjerge, agjar sar so sikage len. Hem odova lafi šujnakjergja pes maškar o Judejcia dži avdije.

¹⁶A o Dešujek učenikja gele ki Galileja, ki gora, kote so sine vakjergja lenge o Isus. ¹⁷Hem štom dikhlele, pokloningepe Leske, a nekoj sumningepe.

¹⁸Togaš o Isus alo lenge paše hem vakjergja lenge: „Dendi Mange tani sa i vlast ko nebo hem ki phuv. ¹⁹Agjar džan, hem kjeren sa e narodon Mle učenikja, krstinen len ko anav e Dadeske hem e Čhaveske hem e Sveti Duhoske! ²⁰Sikaven len te pazinen sa so zapovedingjum tumenge! Hem ekje, Me Sijum tumencar ko sa o dive dži ko krajo e svetoskoro. Amin!“