O Isus anglo Pilat

¹A koga disilo avrijal, sa o sveštenikja glavatojra hem o narodna starešine kjerena sine lafi protiv o Isus, za da te mudarenle. ²Hem phanlele, ingargele hem predajngele e upraviteleske o Pontij Pilat.

³Togaš o Juda, koj predajngjale, otkoga dikhlja deka osudingele, pokajngjapes hem irangja o trijanda srebrenikja e prvosveštenikonge hem e starešinenge,

⁴vakjeribaja: „Grešingjum, soske predajngjum nevino rat.“

A ola vakjerge leske: „So isiamen amen odoleja? Odovaj ti buti!“

⁵Togaš frdingja o srebrenikja ko Hrami, iklilo hem gelo hem obesingjapes.

⁶A o prvosveštenikja lele o srebrenikja hem vakjerge: „Na ovela te mukenpes e hrameske ki blagajna, soske tano cena baši o rat.“ ⁷Nego, otkoga kjergepe lafi, kinge olencar i Grnčarevo Niva baši grobia baši strancia. ⁸Odoleske odoja niva dži avdije vikinelapes Ratvali Niva. ⁹Togaš ispolningjapes o vakjerdo preku o prorok Eremija, koj vakjerela:

‘Hem lele o trijanda srebrenikja,
i cena e Ocenimeskiri,’
Kas so oceninge e Izraeleskere čhave,
¹⁰‘hem dengelen baši i Grnčarevo Niva,
sar so naredingja mange o Gospodari.’

¹¹A koga o Isus terdilo anglo upraviteli, hem o upraviteli pučljale: „Tu li sijan Judejsko caro?“

A o Isus vakjergja: „Tu vakjereja.“

¹²Hem koga obviningele o prvosveštenikja hem o starešine, na odgovorinela sine ništo.

¹³Togaš o Pilat vakjergja Leske: „Zar na šuneja so sa svedočinena protiv Tute?“

¹⁴Hem na odgovoringja leske nitu ko jek lafi, agjar so o upraviteli čudingjapes but.

¹⁵A ko sekova prazniko o upraviteli sinele običaj te mukel e narodoske jek zatvorniko, kas so bi rodenale. ¹⁶Togaš sinelen pročujmo zatvorniko, koj vikinelapes sine Varava. ¹⁷Hem koga khedingepes, o Pilat vakjergja lenge: „Kas mangena te mukav tumenge? E Varava li, ili e Isuse, vakjerdo Hristos?“ ¹⁸Soske džanela sine deka predajngele taro zavist.

¹⁹Hem dži kote bešela sine ki stolica e sudibaskiri, oleskiri romni bičhagja dži ki leste te vakjeren leske: „Ma kjer Leske ništo Odole Pravednikoske, soske avdije but cidingjum, ko suno, baši Leske!“

²⁰Ama o prvosveštenikja hem o starešine čhivena sine e narodon te izmolinen baši o Varava, a e Isuse te mudarenle.

²¹Togaš o upraviteli ko odgovor vakjergja: „Kas taro duj džene mangena te mukavle?“
A ola vakjerge: „E Varava!“

²²O Pilat vakjergja lenge: „A so te kjerav togaš e Isuseja, vakjerdo Hristos?“
Sarine vakjerge: „Te ovel raspnimo!“

²³A ov vakjergja: „Savo bilačhipe kjergja?“
A ola panda posilno vikinena sine: „Te ovel raspnimo!“

²⁴A o Pilat štom dikhlja deka ništo na pomožinela, nego o vikiba ovela pobaro, lelja pani hem thogja pe vasta anglo narodo hem vakjergja: „Nevino sijum baši o rat akale Pravednikoskoro! Tumen dikhen!“

²⁵Hem celo narodo odgovoringja hem vakjergja: „Oleskoro rat ki amende hem amare čhavende!“

²⁶Togaš muklja olenge e Varava, a e Isuse kamšikujngjale hem predajngjale te raspninenle.

²⁷Togaš o vojnikja e upraviteleskere ingargele e Isuse ki pretorija hem khedinge celo četa okolu Leste. ²⁸Ikavge Oleskere šeja hem čhige Leske loli nametka; ²⁹pletinge venco taro kare hem čhige Leske ko šero hem trska ki Leskiri desnica; hem pele ko kočia anglo Leste, hem asanajne Leske, vakjeribaja: „Zdravo, Care Judejsko!“ ³⁰Hem čhungarge ki Leste, lele i trska hem khugele ko šero.

³¹Otkoga asandile Leske, ikavge taro Olestar i loli nametka hem uragele ko Oleskere šeja hem ingargele te raspninenle.

E Isuse kovinenale ko krsto

³²A ko ikljojbe sretninge manuš Kirinejco, ko anav Simon, hem čhigele te ingarel o krsto Leskoro.

³³Hem koga resle ko than vakjerdo Golgota – so značinela: Than Čerepeskoro, ³⁴dengele te pijel mol, mešimo žolčkaja, ama koga vkusingja, na manglja te pijel.

³⁵A koga raspningele, razdelinge Oleskere šeja, frdinge žrepka, za da te ispolninelpes o vakjerdo preku proroko:

‘Razdelinge o šeja Mle maškar peste
hem baši o šeja Mle frdinge žrepka.’

³⁶Hem bešena sine hem pazinenale sine othe.

³⁷Hem čhige Leske upreder Oleskoro šero natpis baši Oleskiri vina: „AKAVAJ TANO O ISUS, CARO JUDEJSKO.“

³⁸Togaš raspninge Oleja duj razbojnikja: jek tari desno, a jek tari levo.

³⁹A okola so nakhena sine hulinenale sine, iranibaja pumare šere, ⁴⁰hem vakjeribaja: „Tu so rušineja o Hrami hem so baši trin dive dzidinejale, spasintu tut, ako sijan Devleskoro Čhavo; huli taro krsto!“

⁴¹Isto vakjerena sine o prvosveštenikja, e knižnikoncar hem e starešinencar, asanajne Leske: ⁴²„E javeren spasingja, a Korkori Pes našti te spasinel. Ovi tano o Izraelevsko Caro! Neka hulel akana taro krsto hem ka poverujnale! ⁴³Ov nadinelapes sine ko Devel, neka izbavinele akana, ako mangelale, soske vakjergja: ‘Devleskoro Čhavo sijum!’“

⁴⁴A isto agjar navredingele o razbojnikja raspnime Oleja.

⁴⁵A taro šovto saati sine temnica ki celo phuv dži ko ejnato saati. ⁴⁶Negde ko ejnato saati o Isus vikingja silno glasoja hem vakjergja: „Ili! Ili! Lama Savahtani!?“ – odova značinela: „Mo Devel, Mo Devel! Soske mukljanman?“

⁴⁷A nekoj taro okola, koj tergjona sine odothe, koga šunge odova, vakjerge: „Akava vikinela e Ilija!“ ⁴⁸Hem odma jek olendar prastandilo, lelja sungeri, topingjale ki kiselina, čhigjale ki trska, hem delale sine te pijel.

⁴⁹A o javera vakjerena sine: „Muk! Te dikha dali ka avel o Ilija te spasinele!“

⁵⁰A o Isus vikingja palem silno glasoja hem mukljale o duho. ⁵¹Hem ekje! I zavesa ko Hrami pharavsalili ko duj, upraldan dži tele, hem i phuv tresingjapes, hem o karpe pharile, ⁵²a o grobia phravdile, hem voskresninge but tejlja taro sveta mule; ⁵³hem iklile taro grobia palo Oleskoro voskresenie, khuge ki Sveto Diz hem javingepes bute dženenge.

⁵⁴A o rimsko oficeri hem okola, koj oleja arakhena sine e Isuse, otkoga dikhle o zemjotres hem sa so ulo, darandile but hem vakjerge: „Čače, Akava sine Devleskoro Čhavo!“

⁵⁵A odothe sine hem dikhena duraldan but romnja, koj sledinena sine e Isuse tari Galileja hem služinena sine Leske. ⁵⁶Maškar lende sine: i Marija Magdalena hem i Marija, i daj e Jakoveskiri hem e Josieskiri, hem i daj e Zavedeskere čhavengiri.

⁵⁷A koga ratilo, alo barvalo manuš tari Arimateja, ko anav Josif, koj hem korkori sine e Isuseskoro učeniko: ⁵⁸ov gelo ko Pilat hem rodingja e Isuseskoro telo. Togaš o Pilat naredingja te ovele dendo. ⁵⁹Hem o Josif lelja o telo, pakjargjale ko čisto čaršafi, ⁶⁰hem čhigjale ko plo nevo grobo, so sine kjergja dupka ki karpa. Hem čhigja baro bar e groboske ki dupka hem gelo peske. ⁶¹A i Marija Magdalena hem i javer Marija, bešena sine odothe karši o grobo.

⁶²A ko javer dive, palo Spremiba, o prvosveštenikja hem o farisea khedingepes ko Pilat, ⁶³hem vakjerge leske: „Gospodar, setingem amen deka odova izmamniko, panda dži kote sine dživdo, vakjergja: ‘Ka voskresninav palo trin dive.’ ⁶⁴Odoleske zapovedin te ovel arakhlo o grobo dži ko trito dive, za da ma te aven Oleskere učenikja te čorenle, hem te vakjeren e narodoske: ‘Voskresningja taro mule,’ hem o posledno hovajba ka ovel pološno taro prvo.“

⁶⁵O Pilat vakjergja lenge: „Ekje tumenge straža; džan hem arakhen, sar so džanena!“ ⁶⁶Ola gele hem obezbedinge o grobo stražaja hem zapečatinge o bar.