Blagodarna baši e Devleskiri milost

(E Davideskoro Psalmi)

¹Blagoslovinle e Gospodare mli duša, hem sa soj tano ki mande: Oleskoro sveto anav!

²Blagoslovinle e Gospodare mli duša, hem ma bistre Oleskere šukaripa so kjergja.

³Ov oprostinela sa tle grevia, Ov saskjarela sa tle bolestia;

⁴Ov spasinela tlo životo taro propast, opkružinelatut šukaripaja hem mangipaja;

⁵Pherela tlo životo šukaripaja, tlo ternipa kjerelale nevo sar e orloskoro.

⁶O Gospodari kjerela pravedna dejlja, hem e maltetirimenge iranela lenge i pravda,

⁷e Mojseske objavingja Ple drumia, e Izraeleskere čhavenge Ple dejlja.

⁸Žalostivo hem milostivo tano Gospodari, isile baro trplenje hem but verno mangipe.

⁹Nae tano holjamo baši večna vremia, nitu Oleskiri holi ačhola zauvek.

¹⁰Na postapinela amencar sprema amare grevia, nitu platinela amenge sprema amaro bezzakonie.

¹¹Soske kobor tano o nebo učo upri phuv, doborom tani bari Oleskiri milost ko okola so darana Olestar.

¹²Kobor tano o istok dur taro zapad, doborom dujrakjergja amendar amare bezzakonia.

¹³Sar so o dat sožalinela pe čhaven, agjar o Gospodari sožalinela okolen, so darana Olestar.

¹⁴Soske džanela šukar sar sijem sozdajme, spomninela Peske deka sijem pravo.

¹⁵E manušeskere dive tane sar čar, bajrona sar polsko luludi.

¹⁶Štom i bavlal ka pipinela hem vekje nae tani, ni olakoro than na pamtinelala.

¹⁷Ama e Gospodareskoro mangipe tano večno upro okola koj darana Olestar, hem Oleskiri pravda upro čhave e čhavengere,

¹⁸upro okola so arakhena Oleskoro zavet, hem pamtinena Oleskere zapovedia, za da te ispolninenlen.

Sekoj te blagoslovinel e Gospodare

¹⁹O Gospodari čhigja Plo prestol ko nebo, hem Oleskoro carstvo vladinela upreder o sa.

²⁰Blagoslovinenle e Gospodare, sa Oleskere angejlja, tumen o mokjna ki sila, koj ispolninenale Oleskoro lafi, poslušna e glasoske taro Oleskoro slovo!

²¹Blagoslovinenle e Gospodare, sa Oleskiri vojska, Oleskere sluge, so ispolninena Oleskiri vojlja!

²²Blagoslovinenle e Gospodare, sa Oleskere dejlja, ko sekova than taro Oleskoro vladiba! Blagoslovinle e Gospodare, mli duša!