Psalm 118
E Gospodareskiri milost
1Aleluja!* Oven blagodarna e Gospodareske, soske tano gudlo, soske tani večno Oleskiri milost!
2Neka vakerel e Izraeleskoro kher: “Večnoj tani Oleskiri milost!”
3Neka vakerel e Aroneskoro kher: “Večnoj tani Oleskiri milost!”
4Neka vakeren sarine so darana taro Devel: “Večnoj tani Oleskiri milost!”
5Vikingjum e Gospodare ko mlo pharipa: O Gospodari šungja man hem ko buvlo than ikalgja man.
6O Gospodari tano mancar hem me na darava: so šaj te kerel mange o manuš?
7O Gospodari tano mancar, Koj pomožinelama man, odoleske dikhava radosno ko okola koj man mrzinenama.
8Pošukari tano te nadinelpe nekoj ko Gospodari, otkolku te nadinelpe ko manuš;
9pošukari tano nekoj te nadinelpe ko Gospodari, otkolku te nadinelpe ko knezia.
10Sa o narodia okružinge man, uništingjum len e Gospodareske ko anav.
11Okružinge man tari sekoja strana; uništingjum len e Gospodareske ko anav.
12Okružinge man sar zinzajra, ama but sigate thabile, sar o kare so thabljona: uništingjum len e Gospodareske ko anav.
13Guringe man, silno za da te perav, ama o Gospodari pomožingja man.
14O Gospodari tano mi sila hem mi gili, Ovi tano mo Spasiteli.
15Radost hem spasenie šungjola ko šatoria e pravednikonge; e Gospodareskiri desnica proslavingjape,
16e Gospodareskiri desnica vazdingja man, e Gospodareskiri desnica proslavingjape!
17Na, nane te merav, nego ka živinav hem ka vakerav e Gospodareskere dejlja.
18O Gospodari kazningja man phare kaznaja, ama na dengja man e meribaske.
19Phraven mange o udara e pravdakere, ka khuvav, ka blagodarinav e Gospodareske!
20Akalaj tale e Gospodareskere udara, o pravednikja khuvena maškar olende!
21Ka blagodarinav Tuke so šungjan man hem uljan mlo Spasiteli.
22O bar so frdingele o zidajra, ulo temelno bar.
23Odovaj tano taro Gospodari, hem but šužoj tano ko amare jajkha!
24Akavaj tano o dive so o Gospodari kergjale; te radujna amen hem te veselina amen ki leste!
25O Gospodar, de amen spasenie! Gospodar, de amen srekja!
26Blagoslovimo koj avela e Gospodareske ko anav, blagoslovinaja tumen taro e Gospodareskoro kher.
27O Devel tano o Gospodari, Ov dela amen svetlina; phanden o kurbani šeleja e oltareske ko šinga soj tane.
28Tu sijan mo Devel – Tuke blagodarinava man: mo Devel – me vozvišinava Tute.
29Blagodarinen e Gospodareske, soske tano gudlo, soske večnoj tani Oleskiri milost.
*Stiho 1: Aleluja značinela Slava e Devleske.