Šungja o Devel mo glaso hem ikagja man

¹Mangava e Gospodare, soske šunela mo glaso tari mi molitva.

²Tejljakergja Plo kan ki mande, odoleske ka vikinavle dži kote dživdo sijum.

³Meribaskere dukha astarge man, mečinge man o pharipa telal e phuvjakere, arakhle man i muka hem i tuga.

⁴Togaš vikingjum e Gospodareskoro Anav: „O Gospodar, spasin mo životo!“

⁵O Gospodari tano milostivo hem pravedno, amaro Devel tano pherdo milosteja.

⁶O Gospodari arakhela okolen soj tane naivna; sijum sine ki nevolja, Ov ikagja man.

⁷Iran tut, mi duša, ko tlo rahatluko, soske o Gospodari kerela tuke sa akava baro šukaripe.

⁸Ov cidingja mo životo taro meriba, me jajkha taro asva, me pre taro periba.

⁹Ka džav anglo e Gospodareskoro muj ki phuv e dživdengiri.

¹⁰Me verujnava hem koga vakeravada: „Ki bari muka sijum.“

¹¹Vakergjum agjar soske sijum sine bunimo: „Sekova manuš tano hovavno!“

¹²So te davle e Gospodare, baši sa so kergja mange?

¹³Ka lav i čaša baši o spasenie hem ka vikinav e Gospodareskoro Anav.

¹⁴Ka ispolninav sa mle zavetia so obečingjum e Gospodareske, anglo sa Oleskoro narodo.

¹⁵Skapoceno tano anglo jajkha e Gospodareskere o meriba taro Oleskere svetije.

¹⁶Gospodar, Tlo sluga sijum; Tlo sluga, čhavo tari Tli sluginka: Tu phragjan me sindžijra.

¹⁷Ka dav Tuke blagodarna žrtve, ka vikinav e Gospodareskoro Anav.

¹⁸Ka ispolninav sa mle zavetia so obečingjum e Gospodareske, anglo sa Oleskoro narodo,

¹⁹ko dvojra e Gospodareske ko kher, maškar tute, Erusalime. Haleluja!