Psalm 139
Psalm 139
Devel Koj sa džanela
Baši o načalniko e pejačengoro. E Davideskoro psalmi.
1Gospodar, dikhejaman celo hem pendžarejaman,
2Tu džaneja koga bešava hem koga uštava, vekje duraldan džanejalen me misle.
3Dali džava ili pašljovava, Tu dikheja sa, pendžarde Tuke sa mle drumia.
4Dži kote mo lafi panda na alo dži ki čhip, a Tu, Gospodar, vekje sa džaneja.
5Tu opkružinejama, palo mande sijan, angli mande sijan, Tlo vas čhivdoj upra mande.
6Odova džandipa previše tano čudno baši mange, previše učo tano, za da te šaj te resavle.
O Devel tano segde
7Kote te džav taro Tlo Duho hem kote te našav taro Tlo muj?
8Ako voznesinavama ko nebo: odothe sijan, ako pašljovava telal ki phuv: hem odothe sijan.
9Ako lavalen o paka e rano sabaleskere hem selinavama ko krajo e moreskoro,
10hem odothe, Tlo vas ka vodinelma, Tli desnica ka ikjerelma.
11Ako vakjerava: „Neka garavenma o karanlukia,“ ama čak hem i rat ka ovel sar svetlo okolu mande!
12Ni o karanluko baši Tuke nae te ovel temno: i rat svetinela sar dive hem o karanluko tano sar svetlina.
13Soske Tu sozdajngjan andral so isiman, hem oformiringjanma me dajake ko vogi.
14Blagodarinava Tuke so sijum sozdajmo doborom čudesno, soj tane Tle dejlja šuže. Mli duša odova šukar džanelale.
15Mle kokala na sine Tuke garavde dži kote sozdajnavaman sine ko tajno, kjerde hor ki phuv.
16Tle jajkha dikhlema pred te ovav ki suština, vekje sine sa pišimo ko Tlo lil; o dive sine mange odredime, panda dži kote na sine ni jek.
17Kobor tane mange vredna Tle plajna, Devla, kobor tane našti te računinav lengoro broj!
18Te gejnavlen, poviše tane tari pošik! Koga džangavgjovava, panda sijum Tuja!
19Devla, uništinlen e bilačhen, neka cidenpe mandar okola so mangena te len mo rat!
20Soske kjerena bunt garavutno protiv Tute, ko čučo vazdenapes Tle dušmajna.
21Gospodar, zarem te na mrzinavlen odola so mrzinenatut? Zarem te na gadojnapes lendar Tle protivnikondar?
22Me mrzinavalen hor mržnaja, hem računinavalen baši mle dušmajna.
23Ispitinma celo, Devla, džan mo srce, ispitinma hem džan me phare misle:
24Dik te na džav palo bilačho drumo hem ingarma palo večno drumo.