O vikiba ko Gospodari

E Davideskoro sikljojbe

(Oleskiri molitva, koga sine ki peštera)

¹Sa me glasoja vikinava ko Gospodari, sa me glasoja molinavape e Gospodareske.

²Me žalbe angli Leste ikavava len, angli Leste me muke dava len.

³Ako mlo duho naele sila čhindilo ki mande, Tu džaneja mo drumo. Ko drumo, palo kova nakhava, garavindor čhige mange stapica.

⁴Ako iranava man desno hem dikhava: nikoj na džanela baši mange. Nane man kote te našav, nikoj na sekirinelape baši mo životo.

⁵Gospodar, ki Tute vikinava; vakerava: „Tu sijan mo than e garajbaskoro, Tu sijan mo delo ki phuv e dživdengiri.

⁶Šun mo vikiba, soske sijum but ponižimo. Ikav man taro okola koj maltretirinena man, soske tane posilna mandar.

⁷Ikal taro karanluko mli duša, te blagodarinav baši Tlo Anav. O pravednikja ka khedenpe okolu mande, baši o šukaripe so sikagjan mange.“