Romano Prevod Tari Biblija
AA

Psalm 25

Molitva baši vodiba hem zaštita

E Davideskoro Psalmi

1Ki Tute, Gospodar, vazdava mli duša.

2Ki Tute nadinavama, mo Devel; ma muk te ladžakjerama, za da ma te radujnenpe upra mande mle dušmajna.

3Čače nae te ladžakjerenpe okola, koj nadinenape ki Tute; ka ladžakjerenpe okola, koj prevarinena bizo pričina.

4Sikavlen mange, Gospodar, Tle drumia, sikavma ko Tle drumia!

5Vodinma ko Tlo čačipe hem sikavma, soske Tu sijan Devel mle spasenieskoro; ki Tute nadinavama celo dive.

6Setintut, Gospodar, baši Tlo vernost hem baši Tlo mangipe, soske ola tale taro večnost.

7Ma setintut baši o grevia mle ternipaskere, baši mle prestapia; setintut baši mande, o Gospodar! spored Tlo mangipe hem baši Tlo gudlipe!

8O Gospodari tano gudlo hem pravedno: odoleske ka sikavel lenge o drumo e grešnikonge.

9Ov vodinela e krotkon ki pravda, sikavelalen e krotkon ko Plo drumo.

10Sa e Gospodareskere drumia tane milost hem čačipa, baši okola koj arakhena Oleskoro zavet hem Oleskere svedoštvia.

11Gospodar, baši Tlo anav, oprostin mo grevo, soske tano baro.

12Koj tano o manuš, koj darala taro Gospodari? Ole, Ov ka sikavele kova drumo te izbirinel.

13Oleskiri duša ka živinel rahati, a leskoro seme ka nasledinel i phuv.

14O Gospodari tano paše uzo okola, koj darana Olestar, hem ka sikavel olenge Plo zavet.

15Mle jajkha tane sekogaš sprema ko Gospodari, soske Ov cidelalen me pre tari mreža.

Molitva baši oslobodiba

16Dikman hem smilujntut mange, soske nanema nikoj hem sijum ma-zmi.

17O pharipe ko mlo srce barile, ikavma taro mle jadia!

18Dik mle nevolje hem muke hem oprostin sa mle grevia.

19Dik mle dušmanen: kobor tane but hem save bare mržnaja mrzinenama.

20Arak mi duša hem spasinma: ma muk te ladžakjerama, soske nadinavama ki Tute.

21O nevinost hem o poštenluko neka pazinenma, soske nadinavama ki Tute!

22Gospodar, izbavin e Izraele, taro sa oleskere nevolje.