Romano Prevod Tari Biblija

Psalm 31

Psalm 31

Molitva baši tuga e pravednikoskiri

Baši o prvo muzičari. E Davideskoro Psalmi.

(Ko vreme ki nevolja.)

1Ki Tute nadinavaman, Gospodar, tena ladžakjeraman nikogaš: ikavma sprema Tli pravda!

2Čhiv paše ki mande Tlo kan, sigjar te oslobodineman! Ov mange cvrsto karpa baši zaštita, tvrdina baši o spasenie.

3Soske Tu sijan mli karpa, mli trvdina, baši Tlo anav vodinma hem upravinma.

4Cideman tari mreža so čhige mange tajno, soske Tu sijan mi sila.

5Ko Tlo vas predajnava mlo duho; Tu otkupingjanma, Gospodar, Devel e Čačipaskoro.

6Mrzinava okolen so poštojnena čuče idojlja, a me nadinavama ko Gospodari.

7Ka radujnama hem ka veselinama ko Tlo milost; soske Tu dikhljan mli nevolja, pendžargjan i tuga ki mli duša

8hem na predajngjanma ko vasta e dušmanenge, ikagjan me pre ko buvlo drumo.

9Smilujntut mange, Gospodar, soske sijum ko tesno, tari tuga slabonena mi jak, i duša hem o telo.

10Mo životo trošingjovela ko kjerkipa, a mle berša ko ofkiba. Mi sila geli ko muke, a mle kokala čhindile.

11Baši sa mle protivnikja uljum lenge ponižime, baši asajbaske mle komšijenge hem te daran mandar o pendžarde; koj dikhenama sine avrijal, našena mandar.

12Sijum sine bisterdo sar mulo ko srcia e manušengere, uljum sar phago čaro.

13Šunava but džene kjerena mo lafi, užas sekotar: dogovorinenape protiv mande hem dikhena sar te len mo životo.

14A me, Gospodar, ki Tute nadinavama, vakjerava: „Tu sijan mo Devel!“

15Mle dive tane ko Tlo vas: ikavman taro vas mle dušmanenge hem taro okola koj goninenama.

16Neka svetinel Tlo muj ko Tlo sluga, spasinma Tle milosteja.

17Gospodar, tena ladžakjerama deka povikujngjumtu; neka ladžan o bilačhe; neka kjutinen telal ki phuv.

18Neka lalorgjoven o hovavne vošta, so protiv o pravedniko kjerena lafi drsko, ko baripa hem dikhenatu but tele.

19O, kobor tano baro Tlo šukaripa, so garavejale baši okola, koj darana Tutar, so spremingjan lenge okolenge, koj nadinenape ki Tute, anglo jajkha e manušengere čhavenge!

20Garavejalen telo štiti Tle mujeskoro, taro manušengere bilačhe plajna; garavejalen ko Tlo šatori taro bilačhe čhibja.

21Blagoslovimo te ovel o Gospodari, soske javingja mange Pli čudesno milost, ki zorali diz.

22Vekje pomislingjum, ki mli buna: „Otfrlimo sijum taro Tlo dikhiba.“ Ama Tu šungjan mo glaso tari mli molba, koga vikingjumtut.

23Mangenle e Gospodare sa Oleskere svetie; o Gospodari arakhelalen Ple vernon, a sprema i zasluga iranela okolenge, koj ponašinenape ko baro.

24Oven hrabra hem Ov ka zojrakjerel tumare srcia, sarine, koj nadinena tumen ko Gospodari!