Blagodarna te ova e Najsilno Devleske

E Davideskoro Psalmi

¹Radujnen tumen, tumen o pravednikja, ko Gospodari! E pravednikonge bešela lenge te proslavinenle.

²Slavinen e Gospodare harfaja, bajraren Ole instrumenteja soj deše žicencar!

³Giljaven Oleske nevi gili, glasno vikibaja hem šukar bašalibaja.

⁴Soske e Gospodareskoro Slovo tano pravedno, hem sa Oleskere dejlja tane čačikane.

⁵Ov mangela pravednost hem pravda, pherdi tani i phuv e Gospodareskere milosteja.

⁶Preku e Gospodareskoro Slovo kerde sine o nebesia, hem preku o zdiv Oleskere mostar: celo olengiri bari vojska.

⁷Khedela e moreskere pajna ki jek kupa, hem o hor pajna čhivela len ko jek redo.

⁸Neka daral celo phuv anglo Gospodari, neka tresinen tari dar Olestar sarine so živinena ko sveto!

⁹Soske Ov vakergja – hem sa ulo, naredingja – hem sa stvoringjape.

¹⁰O Gospodari pejljakerela o plajna olengere so isi len ki godi okolengere koj so na pendžarena e Devle, čhinavela o namere e narodongere.

¹¹E Gospodareskiri namera ačhola večno, hem o misle ko Oleskoro srce taro rodo ko rodo.

¹²Blago odole narodoske kaske o Gospodari tano Devel, e narodo so izbiringjale baši Plo nasledstvo.

¹³O Gospodari dikhela taro nebesia, hem dikhela sa e manušikane čhaven.

¹⁴Taro Plo than kote so živinela dikhela sa e manušen so živinena ki phuv;

¹⁵Ov kergja sa olengere srcia hem pazinela ko sa olengere dejlja so kerena.

¹⁶But baro broj vojska na spasinelale e caro, i bari sila na spasinelale e silno manuše.

¹⁷Ko gras džabe te nadine tut za da te izbavinel tut, hem uzo celo oleskiri bari sila, ov našti te spasinel.

¹⁸Eke, e Gospodareskiri jak upro okola koj so darana Olestar, upro okola, koj nadinenape ki Oleskiri milost:

¹⁹deka ka spasinel olengiri duša taro meriba, hem deka ka parvarel len ko dive kogaj bokhalipa.

²⁰Amari duša nadinelape ko Gospodari, Ovi tano amari pomoš hem amaro štiti.

²¹Amaro srce radujnelape ki Leste, amen nadinaja amen ko Oleskoro sveto anav.

²²Neka to milost, O Gospodar, ovela upro amende, sprema odova sar nadinaja amen ki Tute.