Матеј 4

Е Исусескоро искушение

¹Тогаш о Духо ингарѓале е Исусе ки пустина, за да те овел искушимо таро бенг. ²Хем откога постинѓа саранда диве хем саранда раќа, најпосле бокхалило.

³Тогаш о искушувачи ало Леске хем ваќерѓа: „Ако сијан Девлескоро Чхаво, ваќер акала бара те овен маре!“

⁴А Ов одговоринѓа хем ваќерѓа: „Пишимој тано: ‘О мануш на ка живинел само таро маро, него таро секова лафи, со икљола таро муј е Девлескоро.’“

⁵Тогаш о бенг ингарѓале ки Свето Диз, чхиѓале ки пак е Храмескири, ⁶хем ваќерѓа Олеске: „Ако сијан Девлескоро Чхаво, фрдетут теле; соске тано пишимо:

‘Ка заповединел Пле ангеленге баши туке,’ хем ‘ка ингарентут ко васта,
за да ма те кхуве то про ко бар.’“

⁷О Исус ваќерѓа леске: „Пишимој тано палем: ‘Ма искушинле е Господаре, тле Девле!’“

⁸О бенг палем ингарѓале ки бут учи гора хем сикаѓа Олеске са о царствиа е светоскере хем оленгири слава, ⁹хем ваќерѓа Олеске: „Ка давтут са акава ако переја хем поклонинејатут манге.“

¹⁰Тогаш о Исус ваќерѓа леске: „Џа туке, сатано, соске тано пишимо: ‘Е Господареске, тле Девлеске, ка поклонинетут хем ка служине само Леске!’“

¹¹Тогаш о бенг мукљале хем еќе, ангејља але хем служинге Олеске.

О почеток тари е Исусескири служба

¹²А кога шунѓа дека о Јован тано предајмо, цидинѓапес ки Галилеја. ¹³Хем откога мукља о Назарет, ало хем селинѓапес ко Капернаум, узо море, ко предејља Завулонови хем Нефталимови, ¹⁴за да те пхерѓовел окова со ваќерѓале о пророко Исаија:

¹⁵‘И пхув Завулонова хем и пхув Нефталимова,
ко друмо е морескоро, тари јавер страна е Јорданескири,
и Галилеја е народонгири;
¹⁶о народо, кој бешела сине ко каранлуко,
дикхља бари Светлина,
хем околенгеда, кој бешена сине
ко тхан хем сенка е мерибаскири,
оленге изгренѓа и Светлина.’

¹⁷Оттогаш о Исус почминѓа те проповединел хем те ваќерел: „Покајнен тумен, соске о царство небесно ало паше!“

¹⁸А кога џала сине узо Галилејско Море, дикхљален е дује пхрален: о Симон ваќердо Петар, хем о пхрал олескоро о Андреј, дека фрдена сине и мрежа ко море, соске сине рибајра, ¹⁹па ваќерѓа оленге: „Авен пали Манде хем Ме ка ќерав тумен рибајра манушенгере!“ ²⁰А ола одма мукле о мреже хем следингеле.

²¹Хем кога гело одотхар, дикхља надари јавера дуј пхрајља: о Јаков е Заведескоро хем о пхрал лескоро о Јован, ко броди ленгере дадеја о Заведеј, сар попрајнена сине пле мреже, хем повикујнѓален. ²²Хем ола одма мукле о броди хем пе даде хем следингеле.

²³Хем о Исус џала сине ки цело Галилеја, сикавела сине ко оленгере синагоге хем проповединела сине о Евангелие баши о царство, хем лечинела сине секова насвалипа хем секоја немоќ машкар о народо. ²⁴Хем ширинѓапес гласо баши Олеске пали цело Сирија; хем анена сине ки Лесте са е насвален, кој цидена сине таро разно насвалипа хем муке, демојна со иси ки оленде, месечајра, хем шлогириме, хем лечинѓален.

²⁵Хем слединелале сине бари гужва тари Галилеја хем о Десеттоградие, таро Ерусалим хем Јудеја, хем окоја страна таро Јордан.