Галатјајна 1

Поздрав

¹О Павле – апостоли, бичхавдо на таро мануша, ниту преку посредство манушестар, него преку о Исус Христос хем о Девел о Дат, Кој воскреснинѓале таро муле – ²хем са о пхрајља, кој тане манцар, џи ко цркве ки Галатија. ³Благодат хем мир ки туменде таро Девел, амаро Дат, хем таро Господари о Исус Христос, ⁴Кој денѓапе Пес баши амаре гревиа, за да те избавинел амен таро авдисутно лукаво веко, пали војља амаре Девлескири хем Дат, ⁵Каске тани слава ко са о веќа. Амин!

Иранена е Христоскоро Евангелие

⁶Чудинавама дека аѓар сигате иранена тумен таро Окова, Кој повикујнѓа тумен е Христоске ки благодат, хем пренакхена ко јавер евангелие, ⁷кова нае тано јавер, само иси дисаве, кола буниненa тумен хем мангена те иранен е Христоскоро Евангелие.

⁸Ама ако хем амен, или ангели таро небо, проповединела туменге јавер евангелие, различно таро окова, со проповедингем туменге, те овел проклето! ⁹Сар со ваќергем поангле хем акана палем ваќерава: ако некој проповединела туменге евангелие, со разликујнелапе таро окова со примингенле, те овел проклето!

О Павле е Христоскоро служители

¹⁰Дали ме акана уверинава е манушен или е Девле? Или настојнава те угодинав е манушенге? Ако панда би угодинавајне е манушенге, нае сине те овав е Христоскоро служители. ¹¹Соске, известинава тумен, пхрајљален, дека о Евангелие, кова проповединѓум, нае тано манушикано, ¹²соске ниту ме приминѓумле таро мануш, ниту сиклиљумле, него преку откровение таро Исус Христос.

¹³Тумен секако шунген баши мло англутно живиба ко јудејство; сар бут превише гонинава сине е Девлескири црква хем уништинава. ¹⁴Хем ко јудејство гељум бут англал таро ме врсниќа ко мло народо, вдахнимо тари пребари сила баши о обичаја амаре прададенгири.

¹⁵А кога сине пали војља Околескири, Кој оделинѓама тари утроба ме дајакири хем повикујнѓама преку Пли благодат, ¹⁶те откринел ки манде Пле Чхаве, за да те проповединавле машкар о народо, на посоветујнѓума одма ко тело хем ко рат, ¹⁷ниту гељум упре ко Ерусалим ко окола, кола англедер манде сине апостојља, него гељум поадари ки Арабија хем палем иранѓума ко Дамаск.

¹⁸А пало трин берш гељум упре ко Ерусалим, за да те дикхав е Петаре, хем ачхиљум ки лесте дешупанџ диве, ¹⁹а некој јавер таро апостојља на дикхљум, освен о Јаков, о пхрал е Господарескоро. ²⁰А палем со пишинава туменге, еќе англо Девел ваќерава дека на ховавава.

²¹Пало одова, аљум ко краја е Сиријаке хем Киликија. ²²А е црквенге ки Јудеја колај тане ко Христа, лично сијум сине ленге панда непознато, ²³ола сине само шунге: „Окова, кој некогаш гонинеламен сине, акана проповединела и вера, која некогаш уништинелала сине.“ ²⁴Хем славинена сине е Девле ки манде.