Romano Prevod Tari Biblija

Galatjajna 2

О Евангелие доверимо е Павлеске баши о необрезиме

1Ко дешуштар берш пало одова гељум упре палем ко Ерусалим е Варнаваја, лељум манцар е Тите, 2а гељум упре пало откровение хем објаснинѓум о Евангелие, кова проповединава машкар о народо, ама на само е угледна водаченге, шајда те на прастава или тена прастандиљум ко чучо. 3Ама ни о Тит, кој сине манцар, иако Грко, на сине принудимо те обрезинелпе, 4хем одова баши тајно анде ховавне пхрајља, кола чхигепе за да те дикхен амари слобода која исиамен ко Христос Исус, за да те поробинен амен. 5Каске на мукхлем ни јек часи, ниту покорингемамен ленге, за да те ачхол туменцар о чачипе таро Евангелие.

6А со однесинелапе баши окола, кола сине рачуниме сар угледна водачиа, саве те сине некогаш, манге тано са јек - о Девел на дикхела е манушеске ко муј - ола о угледна водачиа ништо на додајнге манге. 7Него, напротив, кога дикхле дека манге тано доверимо о Евангелие машкар о необрезиме, сар е Петареске машкар о обрезиме, 8соске Окова, Кој ќерела бути е Петреја баши апостолство машкар о обрезиме, ќерела бути манцарда баши о паганска народо.

9Хем кога халиле и благодат, сој манге тани денди, о Јаков, о Кифа хем о Јован, кој сине рачуниме баши стубиа, денге амен, ман хем е Варнава, о деснице ко знако е заедништвоскоро; за да те џа амен џико паганска народо, а ола џико обрезиме; 10само те спомнинаменге баши о чороле, баши исто, со хем дава сине мандар са те ќеравле.

Оправдиме преку и вера ко Исус Христос

11А кога о Кифа ало ки Антиохија, спротивсалиљум леске англо муј, соске требела сине те овел осудимо. 12Уствари, пред те авен некој таро Јаков, ов хала сине е нееврејско народоја, но кога але акала, ов повлечинѓапе хем отстранинѓапе тари дар таро обрезиме. 13Хем ќеренајне дујмуја олеја хем о јавера Јудејциа, аѓар со оленгоро дујмујалипа цидинге хем е Варнава.

14Кога дикхљум дека на џана право според о чачипа таро Евангелие, ваќерѓум е Кифаске англо сарине: „Ако ту, кој сијан Јудејцо, живинеја сар о народо; а на јудејско, сар шај те принудине е народон те живинен јудејско?

15Амен сијем бијаме Јудејциа, а на грешниќа таро народиа. 16Ама пошто џанаја дека о мануш на оправдинелапес таро дејља е Законескере, него само преку и вера ко Исус Христос, хем амен поверујнгем ко Христос Исус, за да те оправдинамен тари вера ко Христос, а на таро дејља е Законескере; соске таро дејља е Законескере нае те оправдинелпе ниту јек мануш.

17Па ако хем амен коркори, мангипаја те оправдинамен ко Христос, аракхлисалилем грешниќа, дали тано тогаш о Христос служители е гревоскоро? Дур таро одова! 18Соске ако палем ѕидинава окова со рушинѓумле, сикававама сар престапнико, 19соске ме муљум преку о Закони баши о Закони, за да те живинав баши о Девел. 20Е Христоја сијум распнимо ко крсто; хем ме веќе на живинава, него о Христос живинела ки манде; а о живото со акана живинава ко тело, живинава преку вера е Девлеске ко Чхаво, Кој замангљама хем предајнѓапе Пес баши манге. 21На поништинава е Девлескири благодат, соске ако и правда авела преку о Закони, тогаш о Христос муло напразно.“