1 Solunjajna 1
Dži ki crkva ko Solunjajna
1O Pavle hem o Silvan hem o Timotej, dži ki crkva e Solunjanenge, ko Devel o Dad hem o Gospodari o Isus Hristos. Blagodat tumenge hem mir.
2Uvek blagodarinaja e Devleske baši sarinenge tumenge, koga spomninaja tumen ko amare molitve, 3soske setinaja amen stalno baši o dejlja tari tumari vera, hem baši tumari buti soj tani taro mangipe tumaro, hem baši tumaro nadež so isile trpenie ko amaro Gospodari o Isus Hristos, anglo amaro Devel hem Dad, 4džandipaja, taro Devel mangle phrajljalen, deka tumen sijen izbirime; 5soske amaro propovediba maškar tumende na sine samo lafeja, nego hem ki sila, hem ko Sveti Duh, hem but hor ubedime; sar so džanena save sijem sine maškar tumende baši tumaro šukaripe.
6Hem tumen dikhlen upri amende sar primer hem ko Gospodari, primingen o slovo ki bari nevolja, radosteja taro Sveti Duh, 7agjar so ulen primer sa e vernikonge ki Makedonija hem Ahaja. 8Soske, tumendar e Gospodareskoro slovo šujnakergja pes na samo ki Makedonija hem Ahaja, nego tumari vera ko Devel širingjape ko sekova than, agjar so nae potreba amen te vakera nešto. 9Ustvari, korkori o vernikja vakerena baši amenge, savo sine o ajbe amaro ki tumende hem sar irangen tumen ko Devel taro idojlja, za da te služinen e dživde hem čačutne Devleske, 10hem te udžaren Oleskere Čhave taro nebesia, Kas so voskresningjale taro mule, e Isuse, Koj oslobodinela amen tari holi so avela.