Oven stalno ki molitva

¹Tumen o Gospodajra, sprema tumare robia oven pravedna hem fer, džandipaja deka hem tumen isi tumen Gospodari ko nebesia.

²Oven stalno ki molitva, džangavde ki late hem blagodarna. ³Molinen tumen hem baši amenge, za da te phravel o Devel o vudar baši o slovo hem za da te propovedina i tajna e Hristoskiri, baši kaske sijum hem ko phanlipe, ⁴hem te sikavavla agjar jasno, sar so trebela te vakerav.

⁵Ponašinen tumen mudro sprema okola soj tane avrijal, koristinen o vreme. ⁶Tumaro lafi uvek te ovel tano ljubezno, začinimo londeja, za da te džanen sar trebela te odgovorinen sekaske.

⁷Baši mange ka vakerel tumenge sa o Tihik, manglo phral hem verno sluga hem so kerela zaedno buti amencar ko Gospodari, ⁸kas so bičhavavale baši odoleske ki tumende, za da te džanen sar sijem amen hem te utešinel tumare srcia, ⁹zaedno e verno hem e mangle phraleja o Onisim, koj tano tumendar. Ola ka vakeren tumenge sar tano akate.

¹⁰Pozdravinela tumen o Aristarh, mo amal soj tano ko phanlipa mancar, hem o Marko, o unuko e Varnavaskoro, baši kaske vakergem tumenge so te keren; ako avela ki tumende priminenle. ¹¹Hem pozdrav taro o phral o Isus, soj tano pendžardo sar Just. Taro Evrea akalaj edinstvena, koj pomožinena man baši e Devleskoro Carstvo hem koj sine mange uteha.

¹²Pozdravinela tumen o Epafras, koj tano jek adathar tumendar, hem sluga e Hrista Isuseskoro, koj uvek borinela pes tumenge ko molitve, za da te tergjoven sovršena hem pherdo uverime ki celo e Devleskiri vojlja. ¹³Svedočinava baši leske deka isile baro prastajba baši tumenge, hem baši okola ki Laodikija, hem baši okola ko Erapol. ¹⁴Pozdravinela tumen o manglo doktori o Luka, hem o Dimas.

Posledna pozdravia

¹⁵Pozdravinen e phralen ki Laodikija; hem e Nimfane hem oleskiri kherutni crkva.

¹⁶Koga ka čitinel pes akava poslanie ki tumende, dikhen te šaj te čitinel pes hem ki crkva ki Laodikija! A okova soj tano tari Laodikija, čitinen hem tumenda!

¹⁷Vakeren e Arhipeske: „Pazin i služba, koja primingjanla ko Gospodari, te ispolninela!“

¹⁸Pozdrav mandar taro Pavle, kovaj pišimo me vasteja. Setinen tumen baši mlo phanlipe. I blagodat tumencar!