1 Solunjajna 2
O Pavle mangipaja služingja maškar o phrajlja
1Soske korkori tumen džanena, phrajljalen, deka amaro ajbe ki tumende na sine ko čučo. 2Nego, iako poangle cidingem hem sijem sine maltretirime ko Filipi, sar so vekje džanena, sijem sine silna ko amaro Devel, te propovedina tumenge e Devleskoro Evangelie maškar i bari borba so sine amen.
3Soske amaro propovediba na sine pogrešno ni nečisto nameraja, nitu hovajbaja, 4nego sar so o Devel proveringja amen hem mukla ko poverenje o Evangelie amenge, hem agjarda keraja lafi, na za da te ugodina e manušenge, nego e Devleske, Koj ispitinela amare srcia. 5Soske, sar so džanena, nikogaš na koristingem hovavne gudle lafia, nitu dikhlem ko korist nešto baši amenge. O Develi tano svedoko baši odova. 6Nitu rodingem slava taro manuša, nitu tumendar, nitu javerendar, iako šaj sine te ikljova sar važna e Hristoskere apostojlja.
7Nego naprotiv, sijem sine gudle maškar tumende, sar doilka, koja tato negujnela ple čhaven. 8Agjar, pherde mangipaja ki tumende manglem te predajna tumenge na samo e Devleskoro Evangelie, nego hem amare duše, soske ulen amenge gudle.
9Odoleske phrajljalen, tumen pamtinena amari phari buti hem amari muka: keribaja dive hem i rat buti, za da te na pera te ova nekaske tumenge ko teret, dži kote propovedingem e Devleskoro Evangelie. 10Tumen sijen svedokja hem o Devel, sar sveto, pravedno hem bizo mahana ponašingem amen maškar tumende, koj verujnena. 11Sar so džanena, amen sekole jeke tumendar, sar o dad ple čhaven godi dengem tumen, hem utešingem tumen, hem sikagem tumen 12te živinen dostojno baši o Devel, Koj vikinela tumen ko Plo Carstvo hem slava.
13Odoleske hem amen blagodarinaja e Devleske stalno, soske koga primingen e Devleskoro slovo, kova so šungenle amendar, primingenle na sar manušikano slovo, nego sar Devleskoro slovo savoj tano čače – kova kerela buti ki tumende, koj verujnena.
14Soske tumen, phrajljalen, lelen tumenge primer taro e Devleskere crkve, koj tane ko Hristos Isus ki Judeja, soske hem tumenda pretrpingen o isto taro tumaro narodo, sar hem ola taro Judejcia, 15taro okola, koj mudarge e Gospodare e Isuse, hem e prorokon, a amen maltretiringe paldinge; ola na ugodinena e Devleske, ola protivinenape sa e manušenge; 16ola koj zabraninena amen te vakera e narodonge, baši te spasinenpe, agjar dopherena ple grevia uvek. Ama najposle e Devleskiri holi ali ki lende!
E Pavleskiri želba te dikhel len
17A amen phrajljalen, otkoga sijem sine kratko vreme odvojme tumendar, dur taro amare jajkha, ama na taro amaro srce, sine amen but bari želba hem trudingem amen sine za da te ava te dikha tumen. 18Hem manglem sine te ava ki tumende; me o Pavle, hem na samo jek puti, nego duj puti, ama o satana čhinagja amen. 19Soske, koj tani amari nadež, ili radost, ili venco, baši pofalba? Na sijen li tumen anglo amaro Gospodari o Isus ko Leskoro ajbe? 20Oja, tumen sijen amari slava hem amari radost.