1 Solunjajna 3
I poseta taro Timotej
1Soske našti sine vekje te trpina odova, mislingem pošukar te ačhova korkori ki Atina, 2a e Timoteje, amaro phral hem e Devleskoro sluga koj kerela buti amencar baši o Evangelie e Hristoskoro, ispratingemle, za da te zojrakerel tumen hem ohrabrinel tumen ki tumari vera, 3za da te na šudrol nikoj ko akala muke; soske korkori džanena deka baši odova sijem opredelime, 4soske koga sijem sine ki tumende, angleder vakergem tumenge deka ka trpina muke, hem sar so džanena agjar hem sine. 5Odoleske me, našti sine te trpinav, bičhagjum te džanav baši tumari vera, te na bi iskušinel tumen okova so iskušinela, hem te na ovel ko čučo amaro trudo.
Šukar haberi taro Timotej
6A akana, otkako alo amenge o Timotej tumendar hem angja amenge šukar haberi baši tumari vera hem mangipe, hem deka isi tumen bari radost koga setinena tumen baši amenge hem deka isi tumen bari želba te dikhen amen, sar hem amen tumen, 7odoleske, phrajljalen, ko sa amare muke hem pharipe, utešisalilem baši tumari vera; 8soske amen živinaja akana, koga tumen tergjovena cvrsto ko Gospodari.
9Soske, baši tumenge savi blagodarnost šaj te preda e Devleske, baši o radost so isi amen baši tumenge anglo amaro Devel? 10I rat hem o dive molinaja amen sa taro srce te dikha tumaro muj hem te dophera odova, so hem falinela tumare verake.
11A korkori o Devel amaro Dad, hem amaro Gospodari o Isus Hristos, te phravel amaro drumo ki tumende! 12A o Gospodari te kerel tumen te bajron hem te phergjoven ko baro mangipe jek javereske hem sprema sarinende, sar so hem amen isi amen ki tumende, 13za da Ov te kerel te oven zorale amare srcia te oven čista bizo mahana, te oven sveta anglo amaro Devel hem Dad, koga ka avel amaro Gospodari o Isus Hristos sa Ple svetijencar.