1 Solunjajna 4
Sar te živinen ugodno e Devleske
1Najposle phrajljalen, rodaja hem opomeninaja tumen ko Gospodari o Isus, te phergjoven panda poviše ko okova so primingen amendar, sar trebela te živinen hem te ugodinen e Devleske, sar so hem napredujngen ko odova. 2Ustvari, džanena so vakergem tumenge te keren ko anav e Gospodareske o Isus.
3Soske, akavaj tano e Devleskiri vojlja, te oven sveta: te ikeren tumen dur taro bludstvo, 4sekoj tumendar te džanel te ikerel plo čaro te ovel sveto hem pošteno, 5a na ko tumare strastia e teloskere, sar o narodia koj na pendžarena e Devle; 6te na iskoristinel hem te na prevarinel pe phrale ko odova, soske o Gospodari ka iranel hem ka kazninel baši odova, sar so vakergem tumenge hem svedočingem poangle. 7Ustvari o Devel na vikingja amen ko melalipa, nego te ova sveta. 8Odoleske, koj otfrlinela odova, na otfrlinela e manuše, nego e Devle, Koj dela tumen hem Plo Sveti Duh.
9A baši o phralikano mangipe nae potreba te pišinav tumenge, soske Korkori o Devel sikagja tumen te mangen tumen jek javere, 10a tumen kerena odova sa e phralenge ki celo Makedonija. Ama, molinaja tumen palem, phrajljalen, te keren odova panda poviše, 11hem te den tumendar sa te živinen mirno, te dikhen tumare bukja hem te keren buti tumare vastencar, sar so naredingem tumenge, 12za da te ponašinen tumen dostojna ko okola soj avrijal, hem te na zavisinen nikastar ništo.
E Gospodareskoro ajbe
13Na mangaja, phrajljalen, te ačhoven ko bidžandipe baši o mule, za da te na tugujnen sar o javera, koj nae len nadež. 14Soske ako verujnaja deka o Isus mulo hem voskresningja, agjar hem o mule ko Isus, o Devel ka anel len Oleja.
15Soske akava vakeraja tumenge preku o slovo e Gospodareskoro, deka amen, koj ka ačhova dživde koga ka avel o Gospodari, nae te dža angleder okola, koj mule; 16soske o Gospodari ka hulel taro nebo ki zapoved, hem ko glaso e arhangeleskoro, hem ki truba e Devleskiri, hem o mule ko Hristos ka voskresninen prvo. 17Palo odova amen o dživde koj ačhilem, ka ova grabime zaedno olencar ko oblakja, ko vozduh, te arakha amen e Gospodareja; hem agjar zauvek ka ova e Gospodareja.
18Odoleske utešinen tumen jek javereja akale lafencar.