1 Solunjajna 5

E Gospodareskoro dive

¹A so kerelape lafi baši o vremia hem o saatia, phrajljalen, nae tumen potreba te pišinel pes tumenge; ²soske korkori tumen šukar džanena deka e Gospodareskoro dive ka avel sar čor rakjate. ³Koga ka vakeren: „Akana mir hem bezbednoj tano,“ togaš taro jek puti ka perel uništiba ki lende, sar duk tari khamni džuvli, hem na ka našen latar.

⁴Ama tumen, phrajljalen, na sijen ko karanluko – ta e Gospodareskoro dive te arakhel tumen sar čor, ⁵soske sarine tumen sijen čhave e svetlinakere hem čhave e diveskere, na pripadinaja e rakjake, nitu e karanlukoske; ⁶hem agjar, te na sova sar o javera, nego te ova džangavde hem te ova nerne: ⁷soske okola koj sovena, sovena rakjate, hem koj makjovena, rakjakoro makjovena.

⁸Amen, koj pripadinaja e diveske, te ova nerne, te urava amen ko oklop e verakoro hem e mangipaskoro, hem e nadežeja e spasenieskoro sar šlemi, ⁹soske o Devel na opredelingja amen baši holi, nego te pridobina spasenie preku amaro Gospodari o Isus Hristos, ¹⁰Koj mulo baši amenge za da te živina zaedno Oleja, bilo te ova džangavde ili te ova mule. ¹¹Odoleske utešinen tumen maškar tumende hem izgradinen tumen te bajroven ki vera jek javereja, sar so hem kerena!

Sar trebela te živinen

¹²Molinaja tumen, phrajljalen, te poštojnen okolen, koj so trudinena pes maškar tumende, hem koj so vodinena tumen ko drumo e Gospodareskoro, hem opomeninena tumen. ¹³Ceninen len upreder o sa mangipaja, baši olengoro delo. Živinen ko mir maškar tumende.

¹⁴Molinaja tumen panda, phrajljalen, sikaven okolen so nae len nisavo redo so na mangena te šunen, ohrabrinen okolen so darana, pomožinen okolen soj poslaba, neka ovel tumen trpenie sarinencar. ¹⁵Dikhen, nikoj nikaske te na iranel bilačhipa bilačhipaja, nego uvek džan palo odova soj tano šukar maškar tumende hem ko sarine!

¹⁶Radujnen tumen uvek! ¹⁷Molinen tumen stalno! ¹⁸Blagodarinen baši sa, soske odovaj tano e Devleskiri vojlja baši tumenge ko Hristos Isus! ¹⁹Ma ačhaven o Duho! ²⁰Ma dikhen len but tele o proroštvia, ²¹ispitinen sa, ikeren odova soj šukar. ²²Ikeren tumen podur taro sekova bilačhipe so ka ikljol!

Pozdravia hem blagoslovia e phralenge

²³A o Devel e mireskoro te osvetinel tumen celosno! Hem tumaro duho, hem duša, hem telo te arakhen pes bizo mahana koga ka avel amaro Gospodari o Isus Hristos! ²⁴Verno tano Okova, Koj vikinela tumen, hem Ov ka kerel odova.

²⁵Phrajljalen, molinen tumen hem baši amenge! ²⁶Pozdravinen sa e phralen sveto čumibaja! ²⁷A zadolžinava tumen ko Gospodari, akava pismo te čitinen sa e phralenge. ²⁸I blagodat amare Gospodareskiri o Isus Hristos te ovel tumencar. Amin!