2 Solunjajna 1
Dži ki crkva ko Solunjajna
1O Pavle hem o Silvan hem o Timotej dži ki crkva e Solunjanenge ko Devel, amaro Dad hem o Gospodari o Isus Hristos: 2Blagodat tumenge hem mir taro Devel amaro Dad hem o Gospodari o Isus Hristos.
3Dužna sijem uvek te blagodarina e Devleske baši tumenge, phrajljalen, sar soj tano pravo, soske tumari vera bajrola but; hem umnožinela pes o mangipe maškar ko sekova jek tumendar, 4agjar so amen korkori falinaja amen tumencar maškar e Devleskere crkve baši tumaro trpenie hem vera ko sa tumaro maltretiranje hem muke, so podnesinena len.
E Hristoskoro ajbe e angelencar ki Pli slava
5Odovaj znako baši o pravedno sudo e Devleskoro, za da te računinen tumen dostojna baši e Devleskoro carstvo, baši kova hem cidena. 6Soske tano pravedno anglo Devel te iranel muka okolenge so mučinena tumen, 7a tumenge, e mučimenge, lokhipa zaedno amencar, koga ka javinel pes o Gospodari o Isus taro nebo, e angelencar ki Pli sila, 8ko plameno jagakoro, za da te iranel okolenge koj na pendžarena e Devle hem koj na mangena te šunen baši o Evangelie amare Gospodareskoro o Isus Hristos; 9koj ka oven kaznime večno uništime dur taro muj e Gospodareskoro hem tari slava Oleskere silatar, 10koga ka avel, ko odova dive, te proslavinel pes ko Ple svetije, hem sa o verna te oven radosna hem te čudinen pes baši Oleske, a isto agjar hem tumenda, soske veraja primingen odova so svedočingem tumenge.
11Odoleske hem molinaja amen uvek baši tumenge: amaro Devel te računinel tumen dostojna baši odova so vikingja tumen, hem te pherel silaja sekoja želba baši šukaripaske hem sekova delo veraja, 12za da te proslavinel pes o anav amare Gospodareskoro o Isus, ki tumende, hem tumen ki Leste, pali blagodat amare Devleskiri hem o Gospodari o Isus Hristos.