1 Timotej 6
Sajgijaja služin
1O robia koj tane telo jarem, te računinen ple gospodaren dostojna baši sekoja sajgija, za da ma te vakjeren nekoj nešto protiv e Devleskoro anav hem o učenje. 2Okola pak kaskere gospodajra tane vernikja na trebela baši odova pohari te sajdinen len. Naprotiv, trebela te služinen lenge najšukar so džanena hem mislinena, soske odoleja pomožinena pe phrale ki vera, so trebela te mangen len. Agjar trebela te sikave len hem godi te de len.
O devlipa nae tano sredstvo baši te pečaline
3Ako nekoj sikavela pojaver hem na sledinela o čačikane lafia amare Gospodareskere o Isus Hristos hem o učenje taro devlipa, 4ovi tano ko baro hem na džanela ništo, nego nasvalo tari želba baši te pučljarelpe hem prepirke taro koj ikljona: o zavist, raspravie, bilačhe lafia, bilačhe sumne, 5čuče prepirke maškar o manuša irame gogjaja hem cidime taro čačipe, koj mislinena deka o devlipa tano sredstvo baši te pečaline.
Te ova zadovolno odoleja so isi amen
6O devlipa hem i tano bari pečalba koga o manuš tano zadovolno odoleja so isile. 7Soske ništo na angem ko akava sveto, nitu šaj te ingara nešto. 8A koga isi amen hajbaske hem šeja, te ova zadovolno odoleja!
9A okola koj mangena te barvaljoven, perena ko iskušenie, ki stapica hem ko but bigogjakere hem štetna želbe, so gurinena e manušen ko propast hem uništiba, 10soske o alčnost tano koreno baši o sekova bilačhipe; nekoj predajnge pes leske, otstraninge pes tari vera hem posagepe pes bute dukhencar.
Pazin i zapoved čisto
11A tu, devlikano manuš, naš taro sa odova! Hem dža palo ko pravednost, devlipa, vera, mangipe, trpenie, hem krotkost! 12Borin tut ki šukar borba e verakiri, astar cvrsto o večno životo, baši kaske sijan vikimo, hem baši kaske dengjan šukar ispoved anglo but svedokja.
13Zapovedinava tuke anglo Devel, Koj dela životo baši o sa, hem anglo Hristos Isus, Koj anglo Pontij Pilat dengja šukar svedoštvo hem ispovedingjape, 14te pazinela i zapoved čisto hem bizo fleka dži ko javiba amare Gospodareskoro o Isus Hristos, 15kova – ko Plo vreme, ka otkrinel o blaženo hem edinstveno Vladeteli, o Caro upreder o cajra hem Gospodari upreder o gospodajra; 16Koj jedino Tano bizo meriba, živibaja kote nae nikas pristap ki svetlina, Kas so nikoj taro manuša na dikhljale nitu šaj te dikhele, Oleske čest hem večno sila. Amin!
Zapoved e barvalenge
17Zapovedin e barvalenge ko akava sveto te na oven ko baro hem te na nadinen pes ko barvalipe kote šaj te našavenle, nego ko dživdo Devel Koj dela amen izobilno sa baši te uživina, 18te kjeren šukar, te oven barvale ko šukar dejlja, te oven darežliva hem rešime te delinen e javere manušencar odova so isi len; 19te kheden baši peske gudlipa sar temeli baši idnina, te astaren cvrsto o čačikano životo.
Pazin i vera
20O Timotej, pazin odova soj tuke tano doverimo, hem cide tut taro nečista hem čuče muabetia hem okola so džana protiv baši o hovavno vakjerdo pendžariba, 21baši kova nekoj ikjerena pes hem agjar cidinge pes tari vera. I blagodat tuja. Amin!