2 Timotej 3
Ka oven phare vremia
1A akava džan: ko posledna dive ka oven phare vremia, 2soske o manuša ka oven sebična, okola so mangena but o pare, korkori te falinenpe, ko baro te keren pes, vakerena phare lafia baši o Devel; na mangena te šunen ni daja ni dade, nae tale zahvalna baši ništo, nečista tane hem nae tane sveta; 3bizo prirodno mangipe, na mangena te smirinenpe, lena ki men, nae len kontrola, diva, dušmajna e šukaripaske, 4predavnikja, izbuvliva, vazdime, poviše dikhena te uživinen ke ple strastia, a na te mangen e Devle, 5koj dikhjovena pobožna, a cidenape tari Oleskiri sila; cide tut asavkendar!
6Soske olendar tane okola koj čhivena pes ko khera hem hovavena odole džuvlen soj tane lokhe ki godi, natovarime grevoncar, koj tane vodime taro razna strastia e teloskere, 7koj sikljovena uvek, a nikogaš našti te aven dži ko pendžariba o čačipe.
8Hem sar so o Janij hem o Jamvrij* sprotivstavinge pes e Mojseske, agjar hem akala protivinena pes e čačipaske, manuša irame gogjaja, prepele tari vera. 9Ama nae te džan anglal vekje, soske olengoro delinipa ka sikavel pes anglo sarine, sar so sikagja pes hem okole dujengoro.
Ačhov ko odova so sikliljanle
10A tu pratineja sine mlo učenje, sar živinava me, soj tani mi odluka, soj tani mi vera, o but baro trpenie, o mangipe, o strplenie te izdržine, 11so sijum sine paldimo maltretirimo, hem cidimo so ulo mange ki Antiohija, Ikonija hem Listra. Pretrpingjum but maltretiringe man, ama o Gospodari ikalgja man taro sa! 12A hem sarine koj mangena te živinen devlikano životo ko Hristos Isus, ka oven maltretirime, 13dži kote o bilačhe manuša hem o hovavne so hovanena ka džan but anglal ko bilačhipe, te hovaven hem ka oven hovavde.
14A tu ačhov ko odova so sikliljanle hem ko so sijan ubedimo, soske džaneja kastar sikliljanle 15hem soske taro tlo tiknipa pendžareja o Sveta Pismia, koj šaj te keren tut mudro baši spasenie preku i vera ko Hristos Isus. 16Celo Sveto Pismo tano taro Devel vdahnimo hem tano korisno baši te sikljova, baši te hajljova kote amare greške, baši te popravina amen hem baši te vospitina amen ki pravda, 17za da te ovel e Devleskoro manuš sovršeno spremimo baši sekova šukar delo.
*Stiho 8: O Janij hem o Jamvrij sine e Faraoneskere magičajra ko vreme e Mojseske, koj džana sine protiv.