2 Timotej 4

Propovedin o Slovo

¹Dava tut odgovornost anglo Devel hem o Hristos Isus, Koj tano spremno te sudinel e dživdenge hem e mulenge, koga ka avel Ov hem Oleskoro Carstvo; ²propovedin o slovo, ov izdržlivo hem ačhov ko odova, ko vreme hem ko nevreme, vaker kote grešinena, vikin lenge, neka ovel tut baro strplenje te ohrabrine len hem te sikave len.

³Soske ka avel vreme, koga o manuša na ka podnesinen te šunen o pravo učenje, nego sprema ple strastia ka birinen peske učitejlja, baši te ovel olengere kanenge šukar, ⁴hem ka iranen ple kana te šunen taro čačipe, a ka iranen pes ko paramisa.

⁵A tu ov džangavdo ko sa, trpin o cidibe, ker i buti sar evangelisti, ker dži ko krajo ti služba. ⁶Soske me vekje čhorgjovava sar žrtva, hem o vreme mle džajbaskoro alo. ⁷Margjum man šukar borba, završingjum o prastajbe, hem pazingjum i vera. ⁸Otakana poadari spremimoj tano mo venco e pravdakoro, so ka dele mange ko odova Dive o Gospodari, o Pravedno Sudija, hem na samo mange, nego hem sarinenge, koj zamangle Oleskoro ajbe.

O Gospodari dengja man sila

⁹Dik so šaj te kere te ave so posigate ki mande, ¹⁰soske o Dimas muklja man, soske zamanglja o avdisutno sveto hem gelo ko Solun; o Kriskent gelo ki Galatija, a o Tit ki Dalmacija. ¹¹Samo o Luka tano uza mande. Le e Marko hem anale tuja, soske mange tano korisno baši služba. ¹²E Tihike bičhagjumle ko Efes. ¹³Koga ka ave, ana i nametka, so mukljumla ki Troada ko Karpus, hem o lila, pogotovo o pergamentia!

¹⁴O kovači o Aleksandar kergja mange but bilačhipe; o Gospodari ka platinel leske sprema oleskere dejlja. ¹⁵Hem tuda pazin tut olestar, soske gelo but protiv baši amare lafia.

¹⁶Ki mli prvo odbrana nikoj na sine mancar, nego sarine mukle man; neka ma te pišinel pes lenge grevo! ¹⁷Ama o Gospodari ačhilo mancar, hem dengja man sila, za da te ispolninel pes o propovediba preku mande, hem te šunen sa o narodia; hem izbavingjum man taro e laveskoro muj. ¹⁸O Gospodari ka izbavinel man taro sekova bilačho delo hem ka zapazinel man baši Plo Nebesno Carstvo. Oleske slava baši večna vejkja. Amin!

¹⁹Pozdravin e Priskila hem e Akila hem e Onisiforeskoro kher! ²⁰O Erast ačhilo ko Korint, a o Trofim mukljumle nasvalo ko Milet. ²¹Dik te šaj te ave angleder o jeven! Pozdravinena tut o Euvul, o Pud, o Lin, i Klaudija, hem sa o phrajlja.

²²O Gospodari o Isus Hristos te ovel tle duhoja! I blagodat te ovel tumencar. Amin!