Tit 1

¹O Pavle, e Devleskoro sluga hem apostoli e Isuse Hristoskoro -- čhivdo sijum baši e Devleskere izbirime za da te bajroven ki vera hem te pendžaren o čačipa, so ingarela ko devlipa, ²ki nadež baši večno životo, so angleder o večna vremia vetingja o Devel, Koj na hovavela, ³a ko pravo vreme javingja Plo slovo preku propoved, soj mange tano doverimo mange sprema i zapoved e Devleskiri, amaro Spasiteli -- ⁴dži ko Tit, mo čačikano čhavo, so isi amen isto vera: i blagodat, i milost hem o mir taro Devel o Dad hem o Gospodari o Isus Hristos, amaro Spasiteli.

Sar valjani te oven o starešine

⁵Odoleske mukljum tut ko Krit, za da te sredine okova so nae tano dovršimo hem baši te čhive starešine ko sa o diza, sar so naredingjum tuke; ⁶ako nekoj so naele mahane, rom jeke romnakoro, ako isile čhave koj verujnena, koj so na kerena o lafi olengoro deka kerena disave bilačhe hem rumime bukja ili deka na šunena; ⁷soske okova soj tano odgovorno so vodinela e Devleskoro kher trebela te na ovele bilačhe mahane: na samo pes te dikhel, ma te ovel holjamo, ma te ovel pijandžija, ma te ovel tepači, ma te dikhel samo ko pare hovajbaja te zaradinel, ⁸nego gostoljublivo, koj mangela te džal palo šukaripa, gogjaver, pravedno, sveto, džanela te ikerel kontrola, ⁹koj ikerela pes cvrsto ko čačikano slovo, agjar sar soj sikavdo, za da te ovel silno te sikavel len ko pravo sikljojbe, hem te dokažinel okolenge so džana protiv.

Isi but so kerena lafi ko čučo hem hovavena

¹⁰Soske, isi but so na mangena te šunen, hem so kerena lafi ko čučo hem hovavena, pogotovo taro obrezime, ¹¹lengere muja trebela te phanden pes, soske ola baši te zaradinen hovajbaja rasturinena cela khera, sikavena len odova so na trebela. ¹²Olengoro sopstveno proroko isile vakerdo: ‘O Kritjajna tale uvek hovavne, bilačhe zvejra, mrzale hem mangena previše te han!’

¹³Akava svedoštvo tano čačikano; odoleske akoš tut lencar oštro, za da te oven cvrsta ki vera, ¹⁴hem te na šunen judejska paramisa hem zapovedia taro manuša kola iranena taro čačipe.

¹⁵Baši o čista saj tano čisto; a baši okola koj tane nečista hem koj na verujnena, ništo nae tano čisto, nego melali tani olengiri godi hem i sovest. ¹⁶Vakerena deka pendžarena e Devle, ama cidena pes pe deloncar; ola tane gadna hem na mangena te šunen, hem nae tane sposobna baši nisavo šukar delo te keren.