Efesjajna 1

Pozdrav dži ki crkva ko Efesjajna

¹O Pavle, preku e Devleskiri vojlja apostoli e Isuse Hristoskoro, dži ko sveta hem verna ko Hristos Isus ko Efes: ²o blagodat ki tumende hem mir taro Devel, amaro Dat hem taro Gospodari o Isus Hristos!

Blagoslovime ko Hristos

³Te ovel blagoslovimo o Devel hem o Dat amare Gospodareskoro o Isus Hristos, Koj blagoslovingja amen, ko Hristos, sekole duhovno blagosloveja, ko nebesna thana; ⁴soske izbiringja amen ki Leste, angleder te sozdajnelpe o sveto, za da te ova sveta hem bizo fleka anglo Leste ko mangipe. ⁵Ov angleder odlučingja te posvoinel amen te kjerel amen Pe čhave preku o Isus Hristos, sprema Pli gudli namera tari Pli vojlja, ⁶za da te ovel falimi i slava tari Leskiri blagodat, kolaja darujnela amen ko Manglo, ⁷ki Kaste isi amen otkup preku Leskoro rat, proška e grevonge, spored o barvalipa tari Leskiri blagodat ⁸koja čhorgjala izobilno amenge ki sekoja mudrost hem razumnost, ⁹otkringja amenge i tajna tari Pli vojlja, spored Pli gudli namera, so odredingjala ki Leste, ¹⁰za da te kjerela koga ka phergjon o vremia; za da te khedel ko jek palem ko Hristos: sa soj tano ki nebesa hem soj tano ki phuv ki Leste, ¹¹ki Kaste hem amenda sijem sine izbirime baši naslednikja, soske sijem sine opredelime angleder e odlukaja Okoleskiri, Koj kjerela sa palo sovet ki Pli vojlja, ¹²za da te ova baši pofalba baši Leskiri slava, amen, koj vekje angleder nadingem amen ko Hristos.

¹³Ki Leste hem tumen, otkoga šungen o slovo e čačipaskoro – o Evangelie baši tumaro spasenie – hem otkoga hem tumen poverujngen, ulen zapečatime e Sveti Duhoja e vetujbaskoro, ¹⁴Koj tano garancija baši amaro nasledstvo, baši otkupuvanje okolen koj ule Devleskoro sopstvenost – baši pofalba Oleskere slavakiri.

Sa pokoringja telo Oleskere pre

¹⁵Odoleske hem me, otkoga šungjum baši tumari vera ko Gospodari ko Isus hem baši tumaro mangipe ko sa o sveta, ¹⁶na ačhovava te zablagodarinav baši tumenge, spomnibaja tumen ko mle molitve, ¹⁷ta o Devel amare Gospodareskoro o Isus Hristos, o Dat e slavakoro, te del tumen duho taro mudrost hem otkrovenie ko čačikano pendžariba Ole: ¹⁸hem te izbistrinel o jajkha taro tumaro srce, za da te džanen savi tani i nadež ko Leskoro povikuvanje, kobori o barvalipe taro Leskoro slavno nasledstvo ko svetie, ¹⁹hem kobor tani prebari Leskiri sila ki amende koj verujnaja spored o delujbe tari Leskiri mokjno sila; ²⁰kaskoro delujbe sikagjale ko Hristos, koga vazdingjale taro mule hem postajngjale desno Pestar ko nebesna thana, ²¹dur upreder sekova načalstvo, hem vlast, hem sila, hem gospodarstvo hem upreder o sekova anav, kova spomninelapes na samo ko akava sveto, nego hem ko idno.

²²Hem sa pokoringja Leske telo Oleskere pre, a Le postajngja baši Šero upreder o sa ki crkva, ²³koj tani Oleskoro Telo – i polnota Okoleskiri, koj pherela sa ko sa.