Galatjajna 6
Ingaren o pharipa jek jekeskere
1Phrajljalen, ako hem da nekoj pelo ko disavo grevo, tumen koj so sijen duhovno zrela, popravinenle krotko duhoja asavke manuše, ama araktu tut te na ove tuda iskušimo. 2Ingaren o pharipa jek jekeskere, hem odoleja ka ispolninen o Zakoni e Hristoskoro!
3Soske, ako nekoj mislinela računinela pes dekaj tano nešto, a nae tano ništo, korkori pes hovavela.
4A sekoj te ispitinel plo delo, pa togaš ka ovele pofalba anglo peste korkori, a na anglo javer. 5Soske sekoj ka ingarel plo pharipe. 6A koj sikljola taro Slovo e Devleskoro, neka delinel sa ple šukaripa so isile okoleja, koj sikavelale.
O manuš so ka sejnel, odova hem ka khedel
7Ma hovaven tumen: o Devel na dozvolinela te khelen tumenge Oleja! Soske so o manuš ka sejnel, odova hem ka khedel: 8koj sejnela ko plo telo, taro telo ka khedel propast; a koj sejnela ko Duho, taro Duho ka khedel večno životo.
9Te na ova umorna te kjera šukar, soske ka kheda ko pravo vreme, ako na umorinaja amen. 10Odoleske, dži kote isi amen vreme, te kjera šukar sarinenge, a najviše okolenge, koj tane ki amari familija soj tane ki vera.
O Pavle vakjerela baši o obrezime hem o neobrezime
11Dikhen, kozom bare bukvencar pišingjum tumenge me sopstveno vasteja!
12Sa okola, koj mangena te kjeren pes važna ko telo, ola čhivena tumen te obrezinen tumen, samo za da ma te oven ola maltretirime koga propovedinelape baši e Hristoskoro krsto. 13Soske ni korkori ola, koj obrezinena pes, na pazinena o Zakoni, a mangena tumen te obrezinen tumen, za da te falinen pes tumare teloja.
14A me sijum dur taro odova te falinav man nešto javereja, osven ko krsto amare Gospodareskoro o Isus Hristos, preku Kaste o sveto tano kovimo baši mange hem me e svetoske! 15Soske nitu o obrezanie tano nešto nitu o biobrezanie, nego te ova neve stvorime manuša.
16Hem sarinenge, koj ka sledinen akava pravilo - mir hem milost, ki lende, hem e Devleske ko Izrael. 17Ponadarik nikoj te na dosadinel man poviše baši asavke bukja, soske ingarava e Isuseskere rane ko mlo telo. 18Phrajljalen, i blagodat amare Gospodareskiri o Isus Hristos te ovel tumare duhoja! Amin!